iklan

HEADLINE, SEGURANSA

Membru UPM 50 deklara aan sai hosi GAM no GAR

Membru UPM 50 deklara aan sai hosi GAM no GAR

Seremónia entrega atributu GAM no GAR husi membru UPM ba Estadu ho tema “Afirmasaun pozisaun membru unidade polísia marítima nian hodi mantein lei no ordem. Seremónia ne’e hala’o iha kampaun UPM, Sionál, Dili (15 abríl 2024). Imajen Tatoli/Antonio Daciparu

DILI, 15 abríl 2024 (TATOLI) – Membru Polísia Nasionál Timor-Leste (PNTL), hosi Unidade Polísia Marítima (UPM) 50 deklara aan hodi sai hosi Grupu Arte Marsiál (GAM) no Grupu Arte Rituál (GAR).

Membru UPM ne’e kompostu hosi Grupu Arte Marsiál Kera Sakti (IKS), iha ema nain-13, Persaudaraan Setia Hati Terate (PSHT) iha ema nain-25, Klibur Oan Timor Rai Klaran (KORK) na’in-lima, enkuantu hosi Grupu Arte Rituál (GAR) 77 iha ema na’in-hitu.

Membru UP 50 ne’e entrega kedas atributu ba Komisaun Reguladora Arte Marsiál no asiste direta hosi Ministru Ineteriór Francisco Guterres, Komandante Jerál PNTL Komisáriu Jerál Polísia Henrique da Costa, Segundu Komandante Jerál PNTL Komisáriu Pedro Belo, Prezidente Komisaun Reguladora Arte Marsiál (KRM) Presidente IKS-TL PSHT, KORK no reprezentante Arte Rituál.

Ministru Interiór Francisco da Costa Guterres hateten, membru PNTL sira tenke dezvinkula aan hosi Grupu arte Marsiál no Arte Rituál atu bele presta servisu ne’ebé profisionál.

“Dala ida tán, ha’u kongratula ita bo’ot sira, ha’u husu nafatin ba komandu para husu nafatin ba membru sira ne’ebé seidauk entrega atributu arte marsiál no arte rituál  atu kontinua entrega tanba kuandu imi la entrega atributu tuir Governu nia orientasaun mak komandu hetan ho voluntáriu, nia tenke sai hosi PNTL”, governante ne’e dehan iha Kuartél UPM, Sionál Dili, segunda ne’e.

Komandante Jerál PNTL Komisáriu Jerál Polísia, Henrique da Costa realsa Komandante Jerál PNTL apresia ho insiativa ne’ebé membru UPM 50 hatudu hodi deklara aan no sees totál hosi envolvimentu atividade GAM no GAR.

“Ida-ne’e nu’udar ezemplu di’ak ba membru PNTL sira tanba sira bele entrga ona atributu GAM no GAR no la envolve ona Grupu Arte Marsiál no Rituál”, nia afirma.

Nia dehan, membru PNTL ne’ebé mak entrega ona atributu arte marsiál no arte ritual mak Komandu sei tau iha fixa família idaidak nian, kuandu aban bain rua iha problema ruma fasíl atu bele identifika.

“Imi hotu nafatin hatudu imi-nia profisionalizmu atu asegura ema no bens sira tanba ne’e hanesan Komandante Jerál husu imi hodi empeña no dedika atu mantein fó seguransa ba ita komunidade no bens sira”, nia fó-hanoin.

Iha fatin hanesan, Prezidente Komisaun Reguladora Arte Marsial (KRAM), Octavio da Conçeição, subliña bazeia ba númeru 5/2017 kona-ba arma branka no prátika arte marsiál iha artigu 24 no 25 hateten ba entidade ne’ebé hola kna’ar hodi responsabiliza ba Estadu RDTL, la bele prátika arte marsiál no arte rituál.

“Ha’u apresia ba saida mak ita-nia membru PNTL hatudu katak tenke hanesan ne’e duni, ajente seguransa tenke hadook aan hosi atividade prátika arte marsiál no arte rituál”, nia dehan.

Komandante Unidade Polísia Marítima, Superintendente Eúgenio Pereira, hateten membru PNTL hosi Unidade Polísia Marítima 50 hakarak afirma sira-nia pozisaun ho vontande tomak atu deklara aan hodi hasees aan totál hosi prátika Grupu Arte Marsiál no Rituál hodi servi de’it institusaun PNTL.

“Ohin ita-nia membru hosi Unidade Polísia Marítima 50 deklara aan ho sira-nia vontade rasik atu hases aan totál hosi Grupu Arte Marsiál no Arte Rituál. Sira afirma katak hakarak servisu de’it ba instituisaun kuandu sira mak envolve aan fila fali ba Grupu Arte Marsiál no Arte Rituál entaun Komandu bele hasai sira hosi instituisaun PNTL”, nia relata.

Tuir nia, asaun membru PNTL hosi Unidade Polísia Marítima ho objetivu tolu mak membru PNTL ka hanesan ajente seguransa atu kontribui ba estabilidade nasaun nian, atu nafatin kaer metin konfiansa hosi komunidade sira nasionál no internasionál no profisionalizmu.

“Ida-ne’e afirma ami-nia pozisaun PNTL nian hanesan instituisaun ne’ebé halo kna’ar ho profisionalizmu hanesan ajente seguransa ba Estadu ida-ne’e”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!