DILI, 16 abríl 2024 (TATOLI) – Komandu Jerál Polísia Nasionál Timor-Leste (PNTL) reune ho Embaixada Xina iha Timor-Leste hodi koalia kona-ba situasaun seguransa atuál iha Timor-Leste inkliui Asosiasaun Emprezáriu Xineza iha Timor-Leste no komunidade Xineza ne’ebé hela iha iha ne’e.
Iha reuniaun ne’e, prosede iha Embaixada Xina no preside direta hosi Embaixadora Xina iha Timor-Leste, Wang Wenli.
Komandante Jerál PNTL, Komisáriu Jerál Polísia Henrique da Costa, dehan Komandu PNTL ho nia estrutura ofisiál superiór enkontru ho Embaixadora Xina inkliui Asosiasaun Emprezáriu Xineza iha Timor-Leste atu atualiza ba sira kona-ba lalaok situasaun seguransa atuál rai laran atu hirak ne’e bele hatene situasaun.
“Ohin ita halo enkontru ida importante tebes entre Embaixadora Xina no Asosiasaun Emprezáriu Xineza iha Timor-Leste. Enkontru ne’e realiza tanba ita hetan pedidu hosi señora embaixadora iha semana rua ba kotuk, señora embaixadora Xina mak husu atu enkontru ho Komandu PNTL. Entaun enkontru ida-ne’e marka prezensa hosi Señora Embaixadora Xina ho nia Konsúl Xina iha Timor-Leste inklui mós Prezidente ba Asosiasaun Xineza sira iha Timor liuhosi”, Henrique da Costa hateten ba jornalista sira iha Embaiaxada Xina Praios dos Coqueiros Dili, tersa, ohin.
Nia dehan, situasaun seguransa sai mós preokupasaun ba Embaixada Xina iha Timor-Leste tanba relasiona ho kazu ne’ebé mak akontese Dili inklui Baucau, Maliana no Liquiça ne’ebé mak xineza balun sai vítima ba krime sira inklui sira balun mós sai autór ba krime.
“Krime sira ne’ebé mak akontese iha Timor-Leste, iha sira-nia ema mós sai vítima noi sira-nia ema balun mós sai hanesan autór, tanba ne’e liuhosi enkontru ida-ne’e ita informa ba sira para bele kria komunikasaun ne’ebé mak di’ak entre PNTL, Embaixada no Assosaisaun atu iha buat ruma ita bele fahe informasaun ba malu”, nia adianta.
Iha fatin hanesan, Embaixadora Xina Wang Wenli, dehan Embaixada Xina halo enkontru ho Komandu Jerál PNTL hodi koalia kona-ba asuntu seguransa iha Timor-Leste.
“Enkontru ida ohin ne’e realiza tanba ba ita presiza servisu hamutuk ho Komandu PNTL no Embaixada Xina inklui Asosiasaun Emprezáriu Xineza iha Timor-Leste atu fortifika kooperasaun ho institusaun Polisia Timor-Leste hodi kria ambiente ne’ebé hakmatek”, nia adianta.
“Situasaun seguransa iha Timor-Leste en-jerál mantein di’ak iha estabilidade no pás maske iha problema krime ne’ebé sidadaun negosiante xineza balun sai vítima maibé ida-ne’e PNTL halo nia servisu di’ak tebes”, nia apresia.
Prezidente Asosiasaun Emprezáriu Xineza iha Timor-Leste, Jason Li Xiaolong, hateten sei kontinua apoiu servisu PNTL nian ba futuru.
“Durante ne’e PNTL halo servisu di’ak, ami husu polísia kontinua halo servisu ne’ebé di’ak no ami apresia ida-ne’e no ba oin ami apoiu liután servisu PNTL”, nia konklui.
Jornalista: Natalino Costa
Editór : Zezito Silva
