DILI, 16 abril 2014 (TATOLI)-Ministériu Saúde liuhosi Unidade Programa Tuberkoluze, iha tinan 2023 liubá rejista ona pasiente moras tuberkoluza hamutuk 6.171 iha teritóriu nasionál no dadus 2022 nian rejista pasiente TBC hamutuk 1.570.
Xefe Unidade ba Programa TBC Ministériu Saúde, Constantino Lopes, relata hosi totál númeru ne’e munisípiu Díli rejista kazu aas tuir mai munisipiu sira hanesan Ermera 763, Oé-Cusse 469 no Baucau 432.
“Munisípiu Dili barak, maibé la signifika ne’e orijén munisípiu Dili no balun mai husi munisípiu seluk no konsulta iha ne’ebá ladi’ak, tanba iha Dili doutór sira iha ne’e entaun sira halai mai iha ne’e, tanba ne’e mak númeru ne’e bo’ot hanesan ne’,e,” nia hateten ba TATOLI, iha Lahane Dili, tersa ne’e.
Husi númeru pasiente moras tubercoluze 6.171, Ministériu Saúde halo mós tratamentu preventiva ba família pasiente hamutuk 10.049 hodi prevene atu moras ne’e labale hada’et ba família sira ne’ebe hela hamutuk iha uma ida.
“Família sira ne’ebé kontatu ho pasiente pozitivu, membru uma-kain, ita fó hotu ai-moruk preventiva ba sira hemu, tanba sira ne’e dalaruma infetadu ona ho bakteria, entaun, hemu atu bakteria labele dezenvolve TB iha futuru,” nia hateten.
Jornalista: Jesuína Xavier
Editor: Agapito dos Santos
