iklan

DILI

Pozisaun PPN ba Governu kona-ba muda komunidade nia barraka iha Dili

Pozisaun PPN ba Governu kona-ba muda komunidade nia barraka iha Dili

Presidente Parlamentu Nasionál, Maria Fernanda Lay. Imajen Tatoli/Egas Cristóvão

DILI, 17 abríl 2024 (TATOLI) – Parlamentu Nasionál liuhusi Prezidente Maria Fernanda Lay apoia másimu ba Governu liuliu Sekretáriu Estadu Asuntu Toponímia Organizasaun Urbana (SEATOU) ne’ebé forma ekipa sobu barraka sira ne’ebé oka iha dalan-ninin sira iha kapitál Dili.

“Ha’u defende povu, maibé povu tenke okupa iha fatin ne’ebé permitidu, labele okupa fali fatin ne’ebé disturbe públiku. Nusa mak ita tenke halo bazár iha tratoar leten, iha Faról, valeta leten, iha mota Bidau nia ninin, ne’e labele, mosu inundasaun ita hakilar Governu,” Fernanda Lay hatete ba jornalista sira iha Palásiu Prezidensiál Bairru-Pite Dili, kuarta ne’e.

Deputada partidu CNRT ne’e hatutan, Governu nia polítika defende povu, maibé labele halo sidade Dili sai hanesan fatin lixu.

“Ha’u agradese SEATOU serbisu másimu tebes komesa halo moos ona Dili laran, ita haree fahi-teen mós la dois ona, iha dalan-ninin sira komunidade sira la okupa ona, nune’e ita bele aselera dezenvolvimentu. Agora ita mai haki’ak hotu animál iha sidade-laran, ita atu lori sidade ne’e ba ne’ebé. Ita komprinde povu ki’ik buka moris maibé tenke buka moris iha fatin ne’ebé adekuadu labele okupa fatin públiku ne’ebé la merese,” nia katak

Tuir nia, Dili tenke halo moos atu nune’e investór internasionál sira bele mai halo investimentu ho seguru nune’e apoiu ekonomia nasaun nian.

SEATOU sobu barraka iha Bidau

Ekipa konjunta ne’ebé lidera hosi SEATOU, semana ne’e, sobu barraka hamutuk 95 ne’ebé okupa espasu públiku, hahú husi ponte BJ Habibie, Bidau Senggol to’o Kuluhun.

Ekipa ne’e kompostu husi SEATOU, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Ministériu Obra Públika (MOP), Terra no Propriedade, Jestaun Merkadu Munisípiu Dili no entidade relevante seluktan.

Ekipa konjunta ezekuta serbisu bazea ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku.

Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun rezidu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.

Nune’e, Governante ne’e nafatin husu ba komunidade hotu hodi koopera nafatin ho Governu bainhira simu ona notifikasaun.

Barraka ne’ebé ekipa konjunta sobu maioria kioske, restaurante, ofisina, roupa segunda mão (obralan) no produtu lokál, ne’ebé sira filafali ba sira-nia fatin antes, tanba sira ne’e maioria husi Bidau Santa Ana, Bidau Toko Baru, Bidau Mota Klaran, Metiaut no balun mai husi Fatuhada.

Dadaun ne’e, ekipa husi Munisípiu Dili iha planu atu hadi’a merkadu sira ne’ebé harii iha tempu Indonézia hanesan merkadu Becora Maufelu, merkadu ki’ik ida ida iha Ponte Benamauk no merkadu boot Taibessi.

Tuir Governu, merkadu Manleuana rasik sufisiente atu akomula vendedór sira hosi Elemloi, Bairru-Pite, no Kampung Baru tanba merkadu referidu Estadu prepara rai etare rua. Dadaun foin dezenvolve metade husi rai ne’ebé prepara.

Governu sobu negosiante iha Ai-mutin

Iha fulan kotuk Governu liu husi SEATOU ho ekipa sobu mós baraka vendedór obralan ne’ebé harii iha Ai-mutin hodi muda ba merkadu Manleuana.

Ekipa ne’ebé hamutuk ho SEATOU mak hanesan ekipa téknika hosi Jestaun Merkadu Munisípiu Dili, MOP, ne’ebé hetan seguransa husi PNTL.

Muda sai vendedór sira ne’ebé fa’an obralan iha Ai-mutin bá Merkadu Manleuna hodi hamamuk fatin ne’e, nune’e públiku bele asesu dalan ne’e, maski vendedór sira balun halo protesta maibé Governu hakarak dezenvolve sidade Dili ne’e sai di’ak, tanba ne’e komunidade tenke koopera ho Governu.

Aleinde ne’e, ekipa responsável halo mós atividade hanesan hahú hosi Bairru Formosa, tanba ne’e husu komunidade hamamuk kalsada (trotoar) ne’ebé sira okupa iha parte Cruz Vermelha de Timor-Leste (CVTL) nia oin to’o semáforu atu sa’e ba Estádiu Munisipál Dili inklui mákina pezadu sei sobu instalasaun iha pedestre ne’ebé komunidade konstrui instalasaun ba fa’an sasán inklui ai-hali sira ne’ebé ema tara labarik nia kan iha Dili laran sei tesi sai hotu.

Governu la’ós foin avizu ba vendedór sira maibé, desde iha setembru 2023 to’o fevereiru 2024, nune’e iha sábadu no domingu ekipa jestaun merkadu sempre fó avizu ba komunidade atu hamamuk maibé nafatin la koopera.

Ho nune’e Governu deside tun sobu nune’e bele halo sidade Dili sai moos no furak.

Merkadu Manleuana iha fatin sufisiente, tanba ne’e negosiante hosi Ai-mutin tama mak Governu fó fatin tanba nu’udar rai Estadu ne’ebé Jestaun Merkadu mak jere.

Negosiante obralan ne’ebé ekipa Governu muda hamutuk ema na’in 258. Husi númeru ne’e na’in-145 mak jestaun merkadu rejistu ona no seluk sei iha prosesu, nune’e muda hotu ba merkadu Manleuana.

Jornalista: Hortencio Sanchez

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!