iklan

EKONOMIA, HEADLINE

Rekrutamentu funsionáriu AIFAESA hein Inspetór Jerál foun

Rekrutamentu funsionáriu AIFAESA hein Inspetór Jerál foun

Inspetór Jerál sesante AIFAESA, I.P, Ernesto Monteiro. Imajen Tatoli/António Daciparu

DILI, 17 abríl 2024 (TATOLI)–Inspetór Jerál sesante Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P), Ernesto Monteiro, hateten, presiza hein Inspetór foun hodi halo rekrutamentu funsionáriu.

“Ha’u agora la’ós hanesan Inspetór Jerál ona maibé sesante ona tanba ha’u-nia mandatu termina ona iha loron 31 marsu. Ha’u atu hato’o katak iha novembru 2023 simu karta ida husi Ministru Koordenadór Asuntu Ekonómiku, Francisco Kalbuadi Lay, hodi notifika ba instituisaun sira ne’ebé tutela, katak funsionáriu kontratu laiha fatin atu estende kontratu,” Ernesto Monteiro hateten ba Agência Tatoli, via telefónika, kuarta ne’e.

Traballadór iha AIFAESA hamutuk 123, ne’ebé funsionáriu kontratadu 96%, signifika na’in-119 mak hanesan funsionáriu kontratadu no hela de’it na’in-lima inklui Inspetór no funsionáriu permanente destakadu.

Hodi nune’e, iha loron 5 janeiru 2024, Inspetór Jerál sesante hato’o ba Ministru Koordenadór atu tetu filafali notifikasaun ne’e tanba funsionamentu AIFAESA presiza hala’o funsaun nafatin.

“Ha’u submete lista funsionáriu sira ne’e hotu ba, pelu menus indika ka nomea ema balun tuir kompeténsia. Maibé laiha informasaun ruma, ho nune’e ha’u fó hatene hela ba funsionáriu sira tanba AIFAESA iha edefísiu rua, ida iha Matadoru no seluk iha Tibar. Tanba lei fó duni biban ba Inspetór Jerál atu deside no halo jestaun, entaun seguransa sira ne’ebé iha ha’u fó hanoin ba sira atu kontinua serbisu no ha’u sei esforsa nafatin atu sira-nia kontratu bele la’o,” nia esplika.

Notísia relevante : AIFAESA fulan-tolu ona lahalo atividade inspesaun tanba laiha funsionáriu

Nune’e, iha funsionáriu nu’udar seguransa na’in-ualu, pesoál limpeza na’in-hitu, inklui administrasaun ka sira ne’ebé kaer sistema hodi halo relatóriu tinan 2023.

“Pesoál hirak ne’e ha’u haruka sira serbisu nafatin, maibé kontratu laiha hosi janeiru to’o marsu 2024, entaun momentu ne’ebá ita akompaña katak Ministru Koordenadór hafoin tratamentu fila hikas mai no iha loron 19 fevereiru ami halo enkontru, no loron tuir mai hatun despaisu ida ba instituisaun autónoma hotu atu rekruta, maibé ba ha’u labele rekruta tanba rekruta ne’e lori tempu naruk, ne’ebé bele estende de’it funsionáriu sira ne’ebé mak instituisaun sira iha hodi funsiona nafatin knaar instituisaun nian,” Inspetór Jerál sesante, esklarese.

Razaun la halo rekrutamentu tanba lei funsaun públika mensiona katak rekrutamentu ninia prosesu ne’e pelu menus fulan-tolu to’o neen.

“Ha’u labele halo tanba urjente, entaun estende de’it funsionáriu sira ne’ebé tinan naruk nia laran serbisu iha AIFAESA, sira iha na’in-17,” nia akresenta.

Momentu ne’ebá Inspetór Jerál sesante estende duni kontratu ba pesoál na’in-17 no haruka serbisu sein kontratu. Ema hirak ne’e mak hanesan pesoál seguransa, pesoál limpeza no parte administrasaun nian. Maibé tanba de’it ninia mandatu ramata iha loron 31 marsu maka Inspetór Jerál sesante halo de’it kontratu ba sira to’o loron 31 marsu 2024.

“Sira na’in-17 ne’e asegura de’it patrimóniu Estadu no administrasaun, enkuantu halo kontrolu ka inspesaun terrenu ne’e presiza ema barak, ne’ebé desde janeiru to’o abríl ne’e laiha atividade iha terrenu tanba laiha funsionáriu,” Ernesto salienta.

Nune’e, iha loron 08 abríl ka semana kotuk, Ministru Koordenadór vizita AIFAESA hodi fahe informasaun katak semana-ne’e sei iha desizaun ba Inspetór Jerál foun.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!