DILI, 18 abríl 2024 (TATOLI)—Ekipa konjunta ne’ebé lidera husi Sekretaria Estadu Asuntu Toponímia no Organizasaun Urbana (SEATOU) sei tun organiza área protejida iha Tasi-tolu iha inísiu maiu tinan ne’e, tanba ne’e ekipa husi Jestaun munisípiu Dili halo ona levantamentu dadus atu identifika númeru uma-kain ne’ebé sei hetan notifikasaun hodi hamamuk fatin.
“Horiseik ami iha ne’ebá, ko’alia ona ho komunidade ne’ebé okupa área protejida iha lagoa Tasi-tolu, foti hela sira-nia dadus, liu-liu sira ne’ebé hela besik lagoa nian, sira-nia paralon liga kedas ba lagoa ne’e. Identifika hotu nune’e semana ida nia-laran sira tenke sobu rasik hodi mákina bele normaliza iha ne’ebá, maibé bainhira la koopera mak to’o inísiu maiu ekipa konjunta sei tun sobu ka hasai tanba atividade ne’ebé ita halo la’o tuir oráriu,” Sekretáriu Estadu Asuntu Toponímia no Organizasaun Urbana, Germano Santa Brites Dias, hateten, hafoin akompaña ekipa konjunta sobu sai komunidade nia uma ne’ebé okupa espasu públiku, iha Bidau Santa-Ana, kinta ne’e.
Notísia relevante : SEATOU sei fó notifikasaun ba komunidade okupa área protejida Tasi-tolu
Governante ne’e dehan, área lagoa Tasi-tolu tenke mamuk tanba hanesan área turizmu ne’ebé komunidade labele hela.
Ekipa identifika ona provizóriamente iha uma-kain 40 to’o 50 maibé númeru ne’e sei aumenta tanba ekipa kontinua halo levantamentu dadus.
“Nune’e, husu ba maluk sira ne’ebé daudaun hela área protejida Tasi-tolu, ita fó ona avizu sira hanesan ne’e tenke koopera hodi husik fatin ne’ebá, tanba serbisu ne’ebé ita halo la’ós ita la gosta malu maibé hotu-hotu hakruk ba lei no hakarak ita-nia sidade sai organizadu no moos,” nia apela.
Iha fatin hanesan, Diretór Servisu Munisipál Jestaun Merkadu Turizmu Munisípiu Dili, Artur Henrique, hateten, ekipa fó ona notifikasaun, katak to’o inísiu maiu tenke husik ona fatin refereridu.
“Bainhira la sai, ekipa ho mákina pezadu tun hasai,” nia alerta.
Tuir planu, ekipa konjunta iha loron 19 abríl sei kontinua hamamuk barraka no uma ne’ebé okupa espasu públiku no área protejida, hahú husi área Cristo Rei parte Kulu-Hun, Becora to’o Terminál Becora no kontinua ba Rai-henek Mutin Beraca Hera.
Ohin ekipa responsável alerta ona ba komunidade ne’ebé hela iha Pantai Kelapa, hahú husi Pertamina Internasionál nia kotuk to’o Bebonuk mota-laran, nune’e mós família ne’ebé okupa mota laran, hahú husi parte Manleuana to’o Bebonuk, ne’ebé entidade hotu tenke koopera hodi sees hosi fatin ne’ebé hetan ona notifikasaun.
“Ekipa tun la haree mota mak uluk ka ema mak hela uluk, maibé haree sé mak okupa rai Estadu, espasu públiku no área protejida sei hasai hotu,” Diretór dehan.
Ekipa konjunta ezekuta serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.
Jornalista : Arminda Fonseca
Editora : Julia Chatarina
