Ministériu Agrikultura konstrui ona armazein haat hodi konserva budu-tasi
DILI, 18 Abríl 2024 (TATOLI) – Ministériu Agrikultura, Pekuária, Peska no Floresta (MAPPF) konstrui ona armazein haat ho osan rihun $120 hodi konserva budu-tasi ne’ebé grupu peskadór sira kolleta molok haruka ba fa’an iha rai-laran no laran.
Diretór-Jerál Peska, Akikultura no Jestaun Rekursu Akuátiku, Celestino da Cunha Barreto, relembra katak, konstrusaun ba armazein ne’e halo iha tinan kotuk, iha Ulmera-Liquiçá ida, Beasu-Viqueque ida no iha Ataúro rua. Kada armazein gasta rihun $30.
Diretór ne’e haktuir katak armazein ne’ebé ministériu konstrui ne’e grupu peskadór sira kuaze uza hotu ona no planu diresaun nian sei harii tan armazein rua, iha tinan oin, iha Ataúro hodi tulun grupu haki’ak-na’in sira ba konserva budu-tasi ne’e.
“Ataúro hale’u ho tasi ne’ebé prodús budu-tasi barak liu, tanba ne’e tenke iha tan armazein rua hodi bele fasilita sira atu rai produtu ne’e. Tanba depois produsaun budu-tasi ne’e, nia folin komesa di’ak ona no kada kilo $2.50, entaun mosu ona grupu barak maka hakarak haki’ak. Nune’e, presiza iha tan armazein sufisiente iha fatin referidu”, dehan.
Celestino Barreto salienta katak produsaun budu-tasi iha Ataúro ba tinan ida ne’e seidauk hatene nia kuantidade, maibé husi tinan sira kotuk produsaun entre tonelada 400 no 500, ne’ebé haruka ona bá Indonézia, Singapura no Vietname.
Tuir dirijente, ho haki’ak budu tasi ne’e bele sustenta ona nesesidade família sira-nian, tanba lukru ne’e hetan husi merkadu lokál nomós merkadu li’ur. Grupu sira ne’e hetan ona formasaun kona-ba jestaun orsamentu no bainhira sira fa’an ona sira-nia produtu, sira maka jere ho didi’ak atu osan sira ne’ebé hetan ne’e bele sirkula nafatin hodi haboot liután produtu ne’ebé sira haki’ak.
Notísia relevante: Ministériu Agrikultura apoia produtór budu-tasi ho rihun $250 iha tinan ne’e
Jornalista: Tomé Amado
Editora: Maria Auxiliadora
