DILI, 19 abríl 2024 (TATOLI) – Diretora Servisu Migrasaun, Inspetór Xefe Polísia, Adelaide da Rosa, dehan Servisu Migrasaun tama mós komisaun ba preparasaun simu vizita Papa Francisco mai Timor-Leste, tanba ne’e, koordenasaun ho Migrasaun Indonézia ho objetivu atu hamutuk hodi fó seguransa ba movimentu ema tama no sai iha fronteira.
“Ita halo ona enkontru koordenasaun ho Migrasaun Kupang no iha ami-nia koodenasaun ida-ne’e di’ak tebes no parte sira prontu apoiu ita, atu sira mós bele ajuda ita fó seguransa ba vizita Amu Papa mai iha ita-nia rain. Ita ho sira hamutuk asegura liña fronteira liga ho movimentu sidadaun nian iha liña fronteira, kuandu ita iha sidadaun balun mak infiltra tama mai no la tuir prosesu legal mak sei foti medida ba nia”, Adelaide da Rosa hateten ba jornalista sira iha nia kna’ar fatin Vila Verde, kinta ne’e.
Nia dehan, Servisu Migrasaun sei tau importánsia hodi fó seguransa ba postu fronteira sira iha liña fronteira liuliu Batugade atu kontrola movimentu ema tama mai iha territóriu nasionál durante vizita Amu Papa, hahú 9 to’o 11 setembru 2024.
“Rekursu hotu ne’e ita sei fó hotu ba Postu Fronteira Batugade atu asegura movimentu sira iha liña fronteira. Ami mós sei fó formasaun ba ami-nia membru sira oinsa halo atendimentu ho di’ak no lalais ba ita-nia sidadaun sira ne’ebé sei tama mai iha Timor-Leste”, nia dehan.
Adelaide da Rosa haktuir Servisu Migrasaun seidauk simu lista fixa sidadaun Kupang atu mai partisipa misa iha vizita Santo Padre nia maibé tuir informasaun provizória ne’ebé iha katak ema hosi Kupang no Atambua atu mai partisipa iha misa iha Tasi-Tolu ho totál besik ema rihun atus ida.
“Tanba ne’e, ita presiza halo kordenasaun dia’k entre nasaun rua tanba ita tama ba ema nia nasaun, laos movimentu iha nasaun laran de’it ne’ebé ita lao ne’e avontade, konserteza ami sei fasilita hodi asegura ema labele viola regra tuir ita-nia lei no ita sei halo kontrolu di’ak liután ba movimentu sidadaun ne’ebé tama mai iha territóriu nasionál, atu bele evita infiltrasaun no buat seluk tán”, nia konklui.
Jornalista: Natalino Costa
Editór : Zezito Silva
