Top

Polísia tránzitu tenke profisionál no evita kobransa ilegál  

Xefe Departamentu Tránzitu no Seguransa Rodoviária, Superintendente Asistente Polísia, Luís da Costa. Imajen Tatoli/Abílio Elo Nini.

DILI, 22 abríl 2024 (TATOLI) – Xefe Departamentu Tránzitu Seguransa Rodaviaria Nasionál, Asistente Superintendente Polísia, Luis da Costa, husu ba membru polísia tránzitu sira atu  servisu ho profisionál no evita halo kobransa ilegál hasoru infratór.

“Husu ba membru tránzitu rodaviaria atu servisu ho profisionál, evita kobransa ilegál hasoru infratór sira. Ita-nia regulamentu disiplinár koalia klaru iha ne’ebá, sé de’it mak servisu la tuir regulamentu disiplinar mak sansaun saida mak atu halo deskreve hotu iha ne’ebá”, Asistente Superintendente Polísia, Luis da Costa, dehan ba jornalista sira iha nia kna’ar fatin Komandu Jerál Caicoli, segunda, ohin.

Nia dehan, Xefe Departamentu Tránzitu Seguransa Rodaviaria Nasionál, seidauk simu keixa ruma hosi komunide katak membru tránzitu halo kobransa illegál hodi hasoru komunidade sira bainhira membru halo pasa revista.

“Membru tránzitu ne’e ho totál liu 300 tanba ne’e mak aviza ba maluk infratór sira katak kualker polisia sé de’it mak pasa revista ba motorizada liuliu ba karta kondusaun tenke fó billete infrasaun para atu selu iha banku, maibé kuandu polísa mak tilang mak la fó billete ba sira entaun nia iha direitu para atu ba keixa”, nia adianta.

Nia dehan, polísia hanesan hanesan ajente seguransa ne’ebé proibe atu simu osan hosi sé de’it, kuandu halo tilan mak infratór sira mós tenke ba selu.

Nia esplika, iha preokupasaun barak katak membru tránzitu sira preende tiha ema nia motór sira depois la foti númeru telemovél infratór nian hodi kontatu fila fali, maibé infratór balun buka fali nia motór.

“Tanba ne’e aproveita oportunidade ne’e hodi aviza ba públiku katak kuandu polisia preende mak la aplika billete, ita bo’ot sira iha direitu hato’o keixa, tanba ne’e bele mosu iregularidade entre pesoál sira tanba pesoál bele kobra osan”, nia dehan.

Luis hateten, membru PNTL dehan halo kobransa ilegál hasoru infratór sira maibé prova ne’e laiha.

“Ha’u sujere no dezafia ba ita bo’ot sira, karik iha prova, favór hato’o keixa ba tránzitu nasionál depois ha’u halo karta ba eselénsia Komandante Jerál atu loke prosesu”, nia afirma.

“Tanba situasaun sira hanesan ne’e ita labele atu hakiak iha institusaun ida naran PNTL ne’e tanba infratór sira kuandu halo sala, respeita sira ba fó bilete, labele husu númeru telefone depois ba hasoru malu iha kintu kantu ne’ebá no ida-ne’e ha’u dehan sei la akontese. Maibé kuandu akontese ha’u dezafia ba públiku katak ita bo’ot sira bele mai ha’u-nia edifísiu tanba ha’u-nia edifísiu ne’e loke ba públiku hodi halao keixa, naran katak mak ne’e tenke iha prova”, nia adianta.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!