Top

Tribunál aplika TIR no AP ba arguidu VMXB

Tribunal Distritál Dili

DILI, 22 abríl 2024 (TATOLI) – Tribunál Judisiál Primeira Instánsia Dili (TJPID) liuhosi despaixu ikus iha segunda (22/4), ohin aplika medida koasaun Termu Identidade Rezidénsia(TIR) no Aprezentasaun Periódika ba kazu extorção e devassa ne’ebé envolve hosi arguidu ho inisiál VMXB.

Iha interrogatóriu dahuluk ne’ebé halao iha Tribunál Judisiál Primeira Instánsia Dili, Ministériu Públiku promove arguidu VMXB ho krime extorção e devassa.

Iha alegasaun Ministériu Públiku nian husu ba Tribunál atu aplika medida koasaun Prizaun Preventiva ba arguidu VMXB hodi asegura arguidu iha prizaun atu nia labele halo lakon faktu sira tanba prosesu investigasaun ba kazu ne’e sei lao.

Hafoin interrogatóriu dahuluk, Defeza hosi Arguidu VMXB, Defensora Públika Joana Cristina Pinto, dehan iha alegasaun Ministériu Públiku husu atu aplika medida koasaun Prizaun Preventiva.

“Ha’u hanesan defeza atu husu ba Tribunál atu aplika media koasaun Aprezentasaun Periódika semana ida dala ida hodi arguidu aprezenta aan ba postu polísia ne’ebé besik”, Joana Cristina hateten ba jornalista sira hafoin interrogatóriu dahuluk, ba arguidu VMXB ne’ebé halao iha Tribunál Judisiál Primeira Instánsia Dili, Segunda, ohin.

Nia dehan, Juiz José Maria de Araujo ne’ebé ka’er interrogatóriu dahuluk ne’e hatún despaixu ikus hodi aplika medida koasaun Termu Identidade Rezidénsia no Aprezentasaun Periódika ba arguidu VMXB hodi aprezenta aan semana ida dala ida iha postu polísia ne’ebé mak besik.

Defeza Joana Cristina simu despaixu ikus hosi Tribunál nian ne’e konsidera despaixu hosi Tribunál adekuadu duni.

Rekorda fali katak Polísia Nasionál Timor-Leste, Departamentu Investigasaun Krimenál (DIK) Nasionál ezekuta mandadu judisiariu hosi Tribunál Primeira Instánsia Dili (TJPID) hodi detein suspeitu ho inisiál VMXB ne’ebé publika video pornografia iha rede sosiál facebook.

Suspeitu VMXB publika video pornografia ida iha nia konta facebook ho deskrisaun ida katak ema ne’ebé mak iha video ne’e mak sidadaun feto ida ne’ebé ho inisiál VMXB ne’ebé daudaun ne’e hanesan artista timoroan ida.

Hafoin publikasaun video ne’e, suspeitu VMXB lakohi entrega aan direta ba polísia hodi submete ba identifikasaun liga ho kazu ne’e. Tribunál Primeira Instánsia Dili iha sesta (19/4), ohin hasai mandadu husu ba Departamentu Investigasaun Kriminál atu detein suspeitu VMXB.

Departamentu Investigasaun Kriminál ba foti suspeitu VMXB iha nia uma, iha área Bebonuk hodi lori mai iha DIK Komandu Jerál PNTL Caicoli hodi submete ba prosesu identifikasaun antes halo detensaun durante oras 72.

“Mandadu Judisiáriu ida-ne’e autoriza Polísia Departamentu Investigasaun Kriminál atu detein suspeitu ho inisiál VMXB ba krime extorção e devassa ne’ebé previstu iha artigu 270 no 183 hosi Kódigu Penál Timor-Leste no polísia bele halo detensaun ba suspeitu ho isiál VMXB iha oras 72 molok aprezenta ba Primeira Interrogatóriu iha Tribunál Judisál Primeira Instánsia Dili”, hateten hosi komunikadu ne’ebé TATOLI asesu foin lais.

Entertantu kazu ida-ne’e, Departamentu Investigasaun Kriminál rejista ho NUC 0233/24.DICMR.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!