iklan

EKONOMIA, HEADLINE

MAPPF avalia rezultadu ba reabilitasaun kafé ektare rihun ualu

MAPPF avalia rezultadu ba reabilitasaun kafé ektare rihun ualu

Diretór-Jerál Agrikultura, Kafé no Planta Industriál, Martinho Laurentino Soares.

DILI, 23 Abríl 2024 (TATOLI) – Ministériu Agrikultura, Pekuária, Peska no Floresta (MAPPF) estabelese ekipa hodi avalia rezultadu ba reabilitasaun kafé ektare rihun ualu iha tinan kotuk, inklui prosesu pagamentu ba komunidade sira ne’ebé nia kafé reabilita ona.

Diretór-Jerál Agrikultura, Kafé no Planta Industriál, Martinho Laurentino Soares, hateten Governu anteriór tau ona orsamentu millaun $4-resin hodi reabilita kafé no husi serbisu reabilitasaun kafé ne’e Ministru Agrikultura, Marcos da Cruz, orienta halo avaliasaun tanba iha implementasaun iha buat balun la tuir realidade serbisu iha terrenu.

“Ministru estabelese ona ekipa ida hamutuk ho empreza sira ne’ebé durante ne’e halo reabilitasaun ba kafé tanba nia konsidera iha problema balun ligadu ho serbisu balun ne’ebé la tuir realidade, inklui prosesu pagamentu ba komunidade sira ne’ebé ninia kafé hetan reabilitasaun ne’e ladín justu”, Martinho Soares informa ba Tatoli iha Comoro, ohin.

Nia salienta ekipa ne’e sei rekolla dadus kona-ba prosesu pagamentu ba kafekultór sira ne’e temina ona ka seidauk no, tuir informasaun, sei iha komunidade na’in-20 husi uma-kain ualu maka ministériu seidauk selu.

“Maibé, iha relatóriu finál dehan selu hotu ona, tanba ne’e maka presiza rekolla fali informasaun hodi hatene problema sira ne’e. Ekipa halo ona sira-nia serbisu hodi rekolla dadus kona-ba prosesu pagamentu ba reabilitasaun kafé komunidade nian. Tempu besik sei submete relatóriu ba ministru atu hatene lala’ok ne’e la’o tuir duni nia dalan ka la’e”.

Liuhusi relatóriu ne’e mak ministru sei deside kontinuasaun ba halo reabilitasaun ba kafé ka la’e, tanba orsamentu alokadu tinan kotuk ne’e ba prosesu reabilitasaun kafé sira iha munisípiu ne’ebé potensiál.

Reabilitasaun kafé ne’e halo liuhusi Asosiasaun Kafé Timor no Kooperativa Kafé Timór, tanba sira maka diretamente implementa programa ne’e. Kada ektare kafé selu ho montante $340 no hun ida selu sentavu 0,21.

Rekorde katak ministériu halo ona identifikasaun ba plantasaun kafé sira iha munisípiu hitu hanesan Aileu, Ainaro, Bobonaro, Ermera, Liquiçá, Manufahi no Manatuto hamutuk ektare 59.921 no rihun 30 maka tenke hetan reabilitasaun, tanba kategoria ninia produsaun ladi’ak ona.

Tuir Programa Nasionál Plantasaun Kafé, Timor-Leste planeia reabilita plantasaun kafé liu ektare rihun 50 até 2030.

Notísia relevante: MAPPF halo ona pagamentu 40% ba reabilitasaun kafé

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!