Tribunál julga arguidu na’in-rua envolve iha krime abuzu konfiansa

DILI, 23 abríl 2024 (TATOLI) – Tribunál Judisiál Primeiru Instánsia Dili (TJPID), tersa (23/4), ohin, halo julgamentu ba Arguidu Damiao Souza no Nuno Ximenes Marçal tanba envolve iha krime abuzu konfiansa ne’ebé previstu iha artigu 257 husi Kódigu Penál Timor-Leste.
Tuir faktu ne’ebé apuradu hosi Ministériu Públiku katak kazu ne’e iha 2021, arguidu Damiao Souza ho arguidu Nuno Ximenes Marçal, servisu iha Empreza HI Energy Lda and Far Ocean Petroleum, ne’ebé halao nia atividade ba fornesimentu kombustivel mina iha Timor-Leste.
Na’in ba Empreza HI Energy Lda and Far Ocean Petróleum ne’e ema sidadaun Singapura ida ho naran Chiang Mun Kk Julian.
Iha 06 maiu 2021, Empreza HI Energy Lda and Far Ocean Petroleum fornese mina gazolina ho 10.000 litru ekivale ba tonela 10, ho kareta ho númeru matríkula A.52.358 Tls. No mina ne’e tula hosi arguidu na’in-rua iha fatin Empreza HI Energy Lda and Far Ocean Petroleum Bebonuk ba Empreza China Harbourd iha área Tibar Munisípiu Liquiça.
Bainhira arguidu na’in-rua tula mina to’o tiha Tibar hodi halo deskarregamentu ba mina ne’e ba Empreza China Harbourd maibé arguidu sira tama ba hodi transfere de’it gazolina tonelada balun no gazolina tonelada balun hela ho arguidu na’in-rua.
Hafoin arguidu na’in-rua transfere tiha mina ne’e, no arguidu sira fila fali mai Dili maibé sira to’o iha Tasi-Tolu foho hún, sira para no ense fila fali mina ne’ebé iha tanke ba iha jerigen hodi ba faan fila fali.
Iha tuku 7:00 Otl, ekipa hosi Empreza HI Energy Lda and and Far Ocean Petróleum halo pasa revista ba karreta ne’ebé arguidu sira uza ba tula mina ne’e, ekipa haree katak mina tanke mamuk.
Entaun ekipa HI Energy Lda and Far Ocean Petróleum Pety Lda nu’udar fornesedór mina ba Empreza China Harbourd husu tuir arguido sira tranfere duni mina gazolina 10.000 litru ekivale ba tonela 10 ba Empreza China Harbourd ka lae, maibé momentu China Harbourd hateten arguidu na’in-rua halo tranferénsia mina la tuir montante ne’ebé mak iha.
Ho nune’e, ekipa sira hato’o kedan asuntu ne’e ba Empreza HI Energy Lda and Far Ocean Paty Lda Chiang Mun Kk Julian no momentu ne’e na’in ba Empreza Chiang Mun Kk Julian hatún desizaun hodi hasai tiha arguidu sira hosi servisu fatin, tanba empreza lakon ona osan ho montante $5,000.00.
Haree ba arguido sira ninia attitude, Ministériu Públiku akuza arguidu sira ba ko-autór materiál, ne’ebé hala’o tiha krime ida ho naran abuzu konfiansa ne’ebé mak todan no krime ida-ne’e previstu iha artigu 257 husi Kódigu Penal Timor-Leste.
Iha sala julgamentu arguidu Damiao Souza, konfesa ba Tribunál katak faktu sira ne’ebé Ministériu Públiku apura iha nia akuzasaun ne’e los hotu.
“Faktu sira ne’ebé iha akuzasaun ne’e los hotu”, Damiao Souza hateten ba Tribunál iha sala julgamentu Tribunál Primeira Instánsia, tersa, ohin.
Nia rekoñese katak momentu ne’e nia ho arguidu Nuno Ximenes maka ba halo transferénsia mina iha China Harbourd iha Tibar Liquica no to’o iha fatin ne’ebá sira halo tiha transferésia iha China Harbourd no prosesu deskarregamentu mina ne’e la tuir montante ne’ebé iha.
“Momentu ne’e, tuir lolos halo deskarregamentu mina ba China Harbourd ho tonelada 10 ho 10.000 litru, maibé la to’o iha tarjetu tanba mina balun ami lori fila mai iha Tasi Tolu hodi faan fila fali no ami nia asaun ida-ne’e momentu ne’e empreza rasik hatene no patraun rasik mak deside hasai duni ami hosi servisu fatin”, nia rekoñese.
Hafoin Tribunál rona tiha deklarasaun hosi arguidu Damiao Souza, Tribunál adia julgamentu ne’e ba fali loron 14/5/2024 tuku 11:00 dader hodi rona fali deklarasaun hosi na’in ba empreza.
Julgamentu ne’e prezide hosi Juiz koletivu Juiz José Goncalves, João Ribeiro, Jumita Freitas, Ministériu Públiku reprezenta hosi Prokuradór Gustavo Moreira da Silva no arguidu sira hetan asisténsia legál hosi Defensór Públiku Manuel Exposto.
Jornalista: Natalino Costa
Editór : Zezito Silva

