iklan

EKONOMIA, HEADLINE

TOMAK forma tékniku 25 kona-ba Agrikultura Matenek no Sensivel ba Klimátika

TOMAK forma tékniku 25 kona-ba Agrikultura Matenek no Sensivel ba Klimátika

Foto/TOMAK.

DILI, 25 Abríl 2024 (TATOLI) – Programa TOMAK – To’os ba Moris Di’ak disponibilza formasaun téknika, entre 22 no 26 abríl, kona-ba Agrikultura Matenek no Sensivel ba Klimátika ba estensionista na’in-25 husi Baucau, Bobonaro no Viqueque.

Espesialista Agrikultura husi projetu TOMAK, José Barros, hateten formasaun ne’e atu aumenta koñesimentu tékniku sira-nia oinsá bele hatene halo adaptasaun, mitigasaun no konservasaun ba rai no udan-been hodi uza iha tempu bailoro hodi garante seguransa ai-han.

“Formasaun ne’e atu hasa’e koñesimentu tékniku sira-nian oinsá bele halo adaptasaun no halo konservasaun agrikultura hodi aplika teknolojia agrikultura rai-lolon nian, tanba iha Timor-Leste ne’e kuaze 40% ninia topografia rai-lolon”, José Barros dehan iha Hera, ohin.

Nia salienta katak liuhusi formasaun ne’e, estensionista sira bele tulun agrikultór sira ne’ebé hela iha área rai-lolon hodi hanorin sira kona-ba oinsá mak halo tanke no kolleta udan-been sira iha uma tatiis atu aproveita fali iha tempu bailoro, hadi’a kadalak sira nune’e bele aproveita udan-been hodi kuda netik buat ruma iha tempu bailoro atu garante ai-han hodi hadi’ak nutrisaun família nian.

“Bainhira tékniku na’in-25 ne’e hetan ona koñesimentu adekuadu, sira sei implementa fali matéria ne’e ba idaidak ninia munisípiu, liuliu hanorin fali inan-aman sira ne’ebé iha to’os iha rai-lolon”, esplika.

Formasaun ne’e TOMAK realiza tanba hetan kooperasaun ho Ministériu Agrikultura, Pekuária, Peska no Floresta (MAPPF) oinsá bele haree prátika ida di’ak atu promove ba inan-aman to’os-na’in sira, nune’e bele enfrenta mudansa klimátika iha país.

Ohin loron problema mudansa klimátika sai preokupasaun boot iha mundu, liuliu iha Timor-Leste kona-ba problema El Niñu (bailoro naruk) no La Niña (udan-been barak liu). Tanba ne’e, TOMAK realiza formasaun ne’ebé foka ba estensionista sira mak haknaar aan iha TOMAK nia alvu, suku no grupu sira ne’ebé daudaun ne’e implementa hela programa kona-ba Agrikultura Matenek no Sensivel ba Klimátika.

Nune’e mós, Xefe Departamentu ba Asuntu Formasaun Estensaun Agríkola, Salvador Ribeiro, haktuir katak tékniku sira ne’ebé partisipa iha formasaun ne’e Viqueque iha na’in-lima,  Bobonaro ualu, Baucau sia no tékniku husi MAPPF tolu.

TOMAK hanesan programa agrikultura ne’ebé finansia hosi Governu Austrália ba tinan-10, ne’ebé liu ona faze dahuluk entre 2016 no 2022 no tama ona faze entre 2022 no 2026. Governu australianu aloka millaun $14 iha faze daruak projetu ne’e. Programa ne’e nia objetivu mak atu mellora kualidade produsaun agríkola iha munisípiu Baucau, Bobonaro no Viqueque.

Projetu ne’e abranje iha kestaun seguransa alimentár no nutrisaun no iha objetivu tulun família sira iha rentabilidade agríkola.

Notísia relevante: Autoridadre prefere TOMAK kontinua implementa atividade agrikultura iha Viqueque

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!