Atividade PNDS tinan 2022 foin atinje 74%
BAUCAU, 22 abríl 2024 (TATOLI) – Atividade haat hosi Servisu Programa Nasionál Dezenvolvimentu Suku (PNDS) Delegasaun Territorial Baucau ba tinan-2022 foin atinje 74%.
Diretór PNDS Delegasaun Teritórial Munisípiu Baucau, Amaro Gusmão Gama Fernandes, esplika, atividade haat ba faze tolu siklu haat (F3S4) komposta hosi reabilitasaun estrada, bee-moos, Reabilitasaun Sede Suku (RSS), Uma Naroman ba Povu (UNP) plus A no B inklui UNP regulár.
“Ha’u garante sei hotu iha fulan-jullu tinan-ne’e. Ne’e orienta Ministeriu Administrasaun Estatal (MAE), tanba sei impaktu ba orsamentu tinan-2024 nian,” Diretór PNDS Munisípiu Baucau hateten iha Vila Nova, segunda ne’e.
Hosi F4S3 hamutuk reabilitasaun estrada hamutuk projetu 25, ho orsamentu hamutuk $1,124,305.00, gastu ona $722, 229.50, balansu $402,075.05 fiziku 91%.
Bee-moos hamutuk projeitu 13, ho orsamentu hamutuk $481,000.00, gastu ona $289,070.60, balansu $191,929.40 no fiziku pursentu 64, RSS projetu hamutuk 22, ho nia orsamentu $264,00, gastu ona $150,775.58, balansu $113,224.42 ho fiziku fiziku 69%.
UNP regular hamutuk projeitu 553 , ho orsamentu $9,419,802.00 gastu ona $6,859,862.18, balansu $2,559,490.82 ho gastu atinjimentu %73, fiziku pursentu 87 no UNP plus A hamutuk projetu 75, husi orsamentu hamutuk $975,000.00, gastu ona $520,209.79, balansu $454,790.21 ho atinjimentu 60%.
“Projeitu barak hanesan UNP seidauk hotu, Rrezilensia Komunitária no Rekoperasaun Ekonomia (RKRE), aumenta tan UNP Plus, ne’e mak fo impaktu ba kapasidade Ekipa Jestaun Suku sira la dun kontrola masimu ba projeitu sira ne’ebé iha,” Amaro Fernandes argumenta.
Amaro Fernandes, rekuiñese no konsidera tarde, tanba difikulta mos husi kondisaun estrada sira, iklima no menus kapasidade ba ezekusaun orsamentu hosi Ekipa Jestaun Suku (EJS).
PNDS Baucau rasik buka solusaun liuhosi maneira sistema “kroek” hodi aselera projeitu hotu ligadu ho orsamentu, liuhusi ekipa kontabilista tun direita iha tereñu hodi rekoilha lista, halo levantamentu hodi selu kompañia fornesedór materiál konstrusaun fabrikadu sira ne’ebé iha ona progresu diak iha tereñu.
Aktividade PNDS tinan-2022 hamutuk projeitu 688, aloka orsamentu hamutuk $12,264,107.00, dadaun gastu ona $8,542,147.10 no balansu $3,721,959.90 ho gastu atinjimentu pursentu 70 no fiziku pursentu 74 ne’ebé implementa iha postu administrativu neen hosi suku 59 iha munsípiu Baucau.
Jornalista : Natalino Belo
Editór : Rafael Ximenes de A. Belo
