Governu inaugura projetu instalasaun transformadór iha Liquiça
LIQUIÇA, 26 abríl 2024 (TATOLI) – Governu liuhusi Ministériu Obra Públika (MOP), Sekretáriu Estadu Eletrisidade Bee no Saneamentu (SEEBS), Eletrisiade de Timor-Leste Empreza Públiku (EDTL, EP) no Embaixada Xina iha Timor-Leste, sesta ne’e, inaugura projetu instalasaun transformadór foun iha Munisípiu Liquiça.
“Ita agradese no fó parabéns ba empreza Xineza TBEA ne’ebé mak kumpre nia kontratu ne’ebé iha durante fulan lima konsege konklui projetu ida ne’e,” Ministru Obra Públika, Samuel Marçal hatete iha nia diskursu bainhira inaugura projetu ne’e.
Governante ne’e dehan, projetu ne’e importante tanba bele aumenta enerjia elétrika ne’ebé di’ak ba komunidade iha Dili, Liquiça no fornese mós ba Portu Tibar.
“Ita halo projetu ida ne’e ho urjente tanba ita nia konsumidór kada loron aumenta bebeik, ida ne’e bele ajuda, ida ne’e mós bele aumenta tan enerjia ba Portu Tibar, bainhira empreza Pelican Paradise hahú konstrusaun sira mós bele utiliza enerjia ne’e,” katak Ministru ne’e
Transformadór ne’ebé instala ona ho nia kapasidade másimu 20 Megavolt ampere iha sub-estasaun Liquiça.
Iha okaziaun ne’e, Embaixadora Xina iha Timor-Leste, Wang Wenli, afirma, inagurasaun ba transformadór foun ne’e sai sasin ba atinjimentu foun husi kooperasaun entre Governu Xina no Timor-Leste.
“Hanesan diplomata Xina nian iha Timor-Leste hato’o parabéns ba ita hotu tanba koopera malu di’ak tebes ikus finaliza projetu ne’e ho susesu. Ha’u aproveita oportunidade ne’e hodi hato’o agradesimentu ba Governu Timor-Leste ne’ebé fó ona konfiansa ba empreza Xina hodi konstrui projetu ida ne’e,” Embaixadora ne’e agradese.
Tuir nia, sub-estasaun ne’e hanesan infrastrutura enerjétika ne’ebé nia-papél importante hodi fó apoiu ba dezenvolvimentu ekonómiku Timor-Leste nian. Ho apoia forte husi Governu Timor-Leste mak empreza TBEA konsege rezolve dezafiu barak no hala’o esforsu maka’as atu labele para.
“Projetu ida ne’e kria ona empregu ba komunidade lokál, fó naroman ba uma-kain sira, hadia vida moris ba rezidente lokál nian no aumenta sira nia felisidade,” Diplomata ne’e kontente.
Projetu ne’e konstrui husi empreza Xina TBEA ne’ebé finansia husi Governu Timor-Leste ho orsamentu hamutuk millaun $3.5 ho nia durasaun fulan lima hahú dezembru 2023 termina ona iha 26 abríl 2024.
Notísia relevante: Xina prontu apoia dezenvolvimentu infraestrutura iha Timor-Leste
Jornalista: Hortencio Sanchez
Editór : Florencio Miranda Ximenes
