Xina prontu apoia dezenvolvimentu infraestrutura iha Timor-Leste
LIQUIÇA, 26 abríl 2024 (TATOLI) – Embaixadora Xina iha Timor-Leste , Wang Wenli, hateten, Governu Xina prontu apoia dezenvolve infraestrutura iha Timor-Leste.
“Xina prontu atu apoia Timor-Leste nia dezenvolvimentu iha área importante haat hanesan revitalizasaun, industriál, dezenvolvimentu infraestrutura no seguransa ba ai-han,” Embaixadora ne’e hatete ba Agência TATOLI iha Liquiça, sesta ne’e.
Notísia relevante: PM Xanana reune ho Prezidente Xina Xi Jinping
Governu Xina kontinua enkoraza empreza Xineza sira hotu ne’ebé iha kompetente di’ak hodi partisipa atu kontribui ba Timor-Leste nia dezenvolvimentu ekonómika.
Diplomata Xineza ne’e hatutan, amizade entre Timor-Leste ho Xina kle’ur ona no Xina mak nasaun ida ne’ebé dahuluk rekoñese independénsia Timor-Leste nian no estabelese relasaun diplomátika.
“Iha setembru tinan kontuk nasaun rua ne’e aumenta tan relasaun ne’ebé di’ak no estratéjiku hodi atinje istóriku iha relasaun bilaterál,” nia tenik.
Tanba ne’e, empreza no ema Xina iha tempu barak envolve ona iha dezenvolvimentu Timor-Leste nian no kooperasaun ekonómiku, komérsiu bilaterál ne’ebé metin liutan.
Notísia relevante:Governu Xina apoia millaun $1.5 ba labarik afetadu inundasaun
Jornalista: Hortencio Sanchez
Editór : Florencio Miranda Ximenes
