iklan

NASIONÁL

Governu Xina apoia millaun $1.5 ba labarik afetadu inundasaun

Governu Xina apoia millaun $1.5 ba labarik afetadu inundasaun

Embaixadora Xina iha Timor Leste, Wang Wenli no Representante UNCEF iha Timor Leste, Bilal Aurang Zeb Durrani, iha serimónia asinatura akordu hodi fó apoiu emerjénsia ba labarik sira afetadu Inundasaun no COVID-19, segunda (19 febreiru 2024) iha salaun Kofi Anan Obrigadu Barack, Caicoli, Dili, segunda (19 fevereiru 2024). Imajen Tatoli/António Daciparu.

DILI, 19 fevereiru 2024 (TATOLI)–Governu Xina servisu hamutuk ho Fundu Nasaun Unida ba Labarik (UNICEF, sigla inglés) fó apoiu millaun $1.5 ba labarik no komunidade ne’ebé afetadu inundasaun iha 04 abríl 2021 no pandemia COVID-19 ba ema 146.000 iha Timor-leste,

Embaixadora Xina iha Timor-Leste, Wang Wenli, hateten agora daudaun ne’e Governu Xina koopera ho UNICEF iha Timor-Leste hodi utiliza fundu dezenvolvimentu global no fundu kooperasaun hosi Xina nian oferese orsamentu millaun $1.47 hodi fó tulun ba labarik no família afetadu hosi inundasaun iha TL.

“Iha tinan hirak-ne’e, Governu Xina iha ona kompromisu apoiu nasaun dezenvolvidu sira ho implementa inisiativa dezenvolvimentu rurál ho ajenda nasaun unida ba Dezenvolvimentu Sustentavél. Fundu kooperasaun ne’e hamenus ki’ak, risku dezastre, nutrisaun, seguransa aihan tanba labarik no foinsa’e mak futuru ba nasaun,” Embaixadora Xina dne’e hateten liuhosi diskursu ihaserimónia asinatura akordu hodi fó apoiu emerjénsia ba labarik sira afetadu Inundasaun no COVID-19, segunda (19 febreiru 2024) iha salaun Kofi Anan Obrigadu Barack, Caicoli, Dili, segunda ne’e.

Reprezentante Fundu Nasaun Unida ba Labarik (UNICEF) iha Timor-Leste, Bilal Aurang Zeb Durrani, hateten TL klasifika niha númeru 111 hosi nasaun 181, signifika vulnerabilidade ba epidémiku klimátiku aas, maibé disponibilidade atu hatán sei kiik tebes, maske vulnerabilidade ba inundasaun ne’e aumenta makaas liután tanba impaktu hosi mudansa klimátika.

“Tinan tolu liubá, ami haree oinsá inundasaun makaas bele fó todan adisionál ba família sira -e’ebé marjinalizadu ona, no halo progresu makaas ba tinan barak hodi hadi’a sira-nia moris. Aleinde halo lakon ema na’in-42, inundasaun iha tinan 2021 hamosu prejuizu ba seguransa bee-moos, estraga eskola liuliu prosesu aprendizajen, enkuantu estraga atividade sira kona-ba produsaun rendimentu uma-kain nian afeta ba saúde no nutrisaun família nian liuliu inan no bebé sira,” nia dehan.

Nia hatete, iha kapiták Dili de’it iha ema na’in-13,554 mak sai dezlokadu iha rai-laran tanba sira -nia uma hetan estraga no asesivél.

“Tinan tolu liu tiha, ita hatene katak moris seidauk fila-fali ba normalidade liuliu ba família sira-ne’ebé afetadu. Ita mós hatene katak família sira-ne’e kontinua moris iha área risku sira-ne’ebé iha dezastre, iha ne’ebé akontesimentu inundasaun iha futuru bele aumenta sira-nia vulnerabilidade atuál,” nia hateten.

Inundasaun iha fulan-abríl tinan 2021 ne’ebé akontese no hasoru mós pandemia COVID-19 ne’e, afeta ba iha teritórriu Timor-Leste ne’ebé rezulta ema na’in-40 mate, uma-kain 30,367 liu mak hetan impaktu, enkuantu atividade aprendizajen lakon tanba eskola 34 no sentru formasaun ba profesór sira hetan estragu.

Tuir estimativa Governu nian, totál estragu no lakon tanba inundasaun iha abríl 2021 mak millaun $307.7.

Maske Governu no parseiru sira kontinua hakaas aan nafatin, komunidade ne’ebé afetadu kontinua presiza asisténsia rekuperasaun liuliu relasiona ho nutrisaun, bee-moos, ijiene no saneamentu no edukasaun.

“Governu Xina kontinua fó apoiu ba dezenvolvimentu Timor-Leste nian hodi envolve iha kooperasaun besik ho Timor-Leste iha área infraestrutura, saúde, agrikultura no edukasaun. Projetu apoiu emerjénsia ida-ne’e, ne’ebé implementa hamutuk ho UNICEF iha Timor-Leste, envolve fundu barak no durasaun projetu ne’ebé naruk liu hodi kobre sidade boot sira iha nasaun laran tomak. Projetu ne’e hein katak sei hetan benefisiu maizumenus labarik no feto na’in 150,000, ho objetivu atu fó asisténsia ba sira-nia moris no edukasaun. Ami hein katak liuhosi projetu ida-ne’e, ema sira iha Timor- Leste bele simu apoiu no enkorajamentu hosi nasaun amigavél sira hanesan Xina,” nia dehan.

Iha munisipiu Dili, Ainaro, Ermera no Baucau ne’e sei kobre labarik na’in-83.000 ho servisu nutrisaun ne’ebé kritiku no feto isin-rua na’in 34.000 sei hetan apoiu ho servisu konsellu kona-ba nutrisaun no fó susu bebé.

Apolu asesu ba bee-moos, saneamentu no ijiene (BESI), ema na’in 10.000 (uma-kain 2.000) hosi munisipiu hirak-ne’e sei hetan servisu BESI ne’ebé diak-liu tia edukasaun, projetu ne’e sei kobre labarik na’in-24.449 ne’ebe sei hetan benefisiu hosi ambiente eskola ne’ebé di’ak-liu iha eskola 34 iha Dili, Baucau, Lautém, Liquica no Manufahi.

“Rekuperasaun hafoin inundasaun, presiza resposta ba tempu naruk tanba komunidade ne’ebé afetadu hasoru ona vulnerabilidade cioin iha saúde, nutrisaun, edukasaun, bee no saneamentu, molok inundasaun akontese. UNICEF apresia apoiu ne’e hosi Governu Xina, ne’ebé sei kontribui atu harii fila-fali servisu sosiál báziku ba labarik no familia sira no mós apoia estabelesimentu mekanizmu redusaun risku dezastre nian sira, hodi hamenus impaktu hosi akontesimentu klimátiku sira iha futuru,” nia hateten.

Prezidente Bee Timor-Leste, Empreza Públiku (BTL, E.P), Carlos Peloi, hateten apresia ho Governu Xina ne’ebé bele apoiu familia afetadu inundasaun no hatán ba pandemia COVID-19 iha TL.

“Apresia ho apoiu hosi Governu Xina nian liuhosi projetu ida-ne’e hodi asesu liután bee-moos, saneamentu no ijiéne nian, no mós nutrisaun ho edukasaun nune’e ita bele atinje planu Timor-Leste ba tinan 2030,” nia hateten.

Diretór Nasionál Infraestrutura Bázika, Hélio Lopes, hateten Ministériu Edukasaun apresia ba Governu Xina tanba bele apoiu ona projetu 34 iha Eskola Ensinu Báziku iha Timor-Leste.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!