Ministériu Justisa husu PCIC no DP presta servisu ho kualidade
DILI, 29 abríl 2024 (TATOLI) – Ministériu Justisa Sergio Hornai, husu ba Polísia Sientífika Insvestigasaun Kriminál (PCIC, sigla portugés) no Defensoria Públika (DP) atu presta servisu ne’ebé kualidade no profisionál atu povu kontinua depozita konfiansa ba institusaun rua.
“Ohin ami halo reuniaun Konsellu Konsultivu ne’ebé mak partisipa hosi instituisaun sira ne’ebé tutela ba Ministériu Justisa, hanesan PCIC, Defensoria Públika no Sekretáriu Estadu Terras Propriadade Servisu Rejistu Notariadu hodi halo avaliasaun ba servisu ne’ebé mak instituisaun atinje ona iha tinan 2024, liuliu Polísia Nasionál Sientífika Investigasaun Kriminál, ha’u husu atu kontinua presta servisu ne’ebé di’ak liután. Oinsá mak atu deteta hodi halo investigasaun Kriminál ne’ebé di’ak, oinsá mak atu hatuur responsablidade prevensaun krime sira ne’ebé ho karater organizadu. Enkuantu ba Defensór Públiku, ha’u husu para ba oin oinsá mak fó asistensia ba komunidade ho másimu, área kriminál no sivíl, nune’e mós krime kontensiozu Estadu”, Justisa Sergio Hornai, hateten ba jornalista sira hafoin reuniaun Konsellu Konsultivu Setór Justisa ne’ebé hala’o iha salaun Ministériu Justisa Colmera, segunda ne’e.
Governante ne’e hateten, presiza konvoka enkontru sira hanesan ne’e atu bele kompleta malu hodi buka solusaun hamutuk iha setór justisa nian, saida mak setór justisa hasoru ohin loron, atu ba oin bele hadi’ak hodi mellora servisu setór justisa bele sai efikasia no efisiente iha servisu atu fó presta servisu ne’ebé profisionál no kualidade.
“Tanba ne’e, liuhosi enkontru Konsellu Konsultivu ida, ita atu haree saida mak presiza eleva iha setór justisa atu bele presta servisu ne’ebé profisionál no kualidade tuir planu estratéjiku dezenvolvimentu no polítika Governu nian ba reforma justsa”, refere.
Iha fatin hanesan, Defensór Públiku Jerál Cancio Xavier, rekoñese Defesoria Públika iha difikuldade rekursu umanu nian.
“Uluk Defensór públiku ida iha rekursu 34, hosi númeru ne’e, ida mate ona no agora daudaun na’in-tolu hetan fi’ar hosi Governu liuliu ha’u rasik hanesan Defensór Públiku Jerál, atuál Ministru Justisa, antes ne’e hanesan pesoál Defensór Públika no ami-nia ema ida foin daudaun Governu nomeia sai Sekretáriu Rejiaun Terras Propriadade no Servisu Rejistu Notariadu iha RAEOA. No ami na’in-tolu la halo servisu hanesan Defesór hodi fó asisténsia legál ba ita-nia sidadaun sira, ami nia ema ne’ebé agora halo servisu iha de’it ema 30”, nia dehan.
Cancio hateten, Defensór Públiku Jerál rejista duni preokupasaun balun hosi komunidade katak Defensoria Públika ladún fó asisténsia másima ba komunidade sira.
“Sim, ami rekoñese, ami rejista problema sira-ne’e no preokupasaun ida-ne’e ami mós sempre simu hanesan ami nia makanan loroloron ona. Maibé ha’u atu dehan de’it katak los duni katak Defensoria iha limitasaun rekursu umanu, tanba dala ruma ami la fó asisténsia d’ak ba komunidade sira. Tanba Defensór ida, nia atende kazu 30 iha loron ida, entaun nia labele fahe nia tempu iha Tribunál Judisiál sira, dalaruma nia tenke ba vizita nia kliente iha prizaun. Maibé hanesan Defensór Públiku Jerál ha’u husu ba Defensoria sira, maske iha difikuldade hanesan ne’e maibé tenke hatudu ita-nia servisu ho profisionál hodi sai Defensór ba ema hodi defende sidadaun sira-nia direitu tuir prinsípiu Defesoria Públika nian”, nia afirma.
Jornalista: Natalino Costa
Editór : Zezito Silva
