Ministru Justisa submete ona lista rekluzu 100 hodi hetan indultu iha 20 maiu

DILI, 29 abríl 2024 (TATOLI) – Ministru Justisa Sergio Hornai, hateten Diretór Estabelesimentu Prizionál Becora, Gleno no Suai submete ona naran prizioneiru sira hamutuk 100 ne’ebé atu hetan indultu iha 20 maiu tinan ne’e.
Lista ida-ne’e, Gabinete Ministru Justisa no Dirasaun Nasionál Prizionál konklui ona prosesu verifikasaun ba naran sira ne’e hodi haruka ona ba Gabinete Primeiru-Ministru atu haree.
“Hosi Diretór Estabelesimentu Prizaun Becora, Gleno no Suai submete naran prizioneiru 100 ne’ebé atu hetan indultu iha 20 maiu tinan ida-ne’e. lista ne’e, Gabinete Ministru Justisa no ami-nia Dirasaun Nasionál Prizionál konklui ona prosesu verifikasaun ba naran sira ne’e, ami submete ona ba Gabinete Primeiru-Ministru atu haree tuir lei no kompeténsia konstitusionál, politíka Governu hodi pronunsia buat ruma molok submete naran sira ne’e ba Prezidente Repúblika atu fó indultu ba sira”, Sergio Hornai hateten ba jornalista sira hafoin reuniaun Konsellu Konsultivu Setór Justisa ne’ebé halao iha salaun Ministériu Justisa Colmera, segunda ne’e.
Nia subliña, lista 100, posibilidade balun mak sei hetan konsensaun no komutasaun pena hosi Prezidente Repúblika.
“Tanba ne’e mak agora lista sira ne’e iha ona Gabinete Primeiru-Ministru no lista sira ne’e hosi Gabinete Primeiru Ministru no Prezidensi Repúblika sei halo análize ba lista sira ne’e no sei fó fali lista ne’e ba señor Primeiru-Ministru hodi halo pronunsiasaun ikus iha Konsellu Ministru, karik ema na’in hira mak atu hetan indultu ka komutasaun pena no hosi ne’e mak sei subemete lista ne’e ba fali Prezidente Repúblika hodi fó indultu ba ita-nia kondenadu sira ne’e”, nia konklui.
Jornalista: Natalino Costa
Editór : Zezito Silva

