Governu aprova rezolusaun empeñamentu operasionál konjunta F-FDTL-PNTL iha ámbitu vizita Amu Papa

DILI, 30 abríl 2024 (TATOLI)– Governu liuhusi enkontru Konsellu Ministru, tersa ne’e,  aprova projetu Rezolusaun Governu nian, ne’ebé aprezenta husi Ministru Defeza, Donaciano do Rosário Gomes no Ministru Interior, Francisco da Costa Guterres, kona-ba empeñamentu operasionál konjuntu entre FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL), iha ámbitu vizita Sua Santidade Papa Francisco mai Timor-Leste.

“Rezolusaun Governu nian ne’e autoriza empeñamentu operasionál hamutuk entre F-FDTL no PNTL, liuhusi operasaun patrullamentu ba  vijilánsia espesiál no kontrolu ba fatin hotu-hotu ne’ebé konsidera sensitivu iha sidade Dili, atu bele prevene no atua situasaun ba indivíduu sira ne’ebé bele kria instabilidade sosiál durante vizita Sua Santidade Papa Francisco,” refere nota ne’ebé Agência TATOLI asesu husi mídia Gabinete Primeiru Ministru, tersa ne’e.

Notísia Relevante: Monseñor Marco Sprizzi louva Estadu TL nia-preparasaun simu Papa Francisco

Atu kumpre operasaun seguransa ne’ebé mosu iha Rezolusaun ne’e, sei kria Forsa-Tarefa Konjunta ida no sei estabelese diretiva konjunta ida, ne’ebé sei prevee planu ba estrutura apoiu lojístika seguransa nian, ba estrutura komandu no komunikasaun, ba regras empeñamentu husi forsa-konjunta, ba apoiu servisu intelijénsia no ba apoiu emerjénsia ka medida preventiva sira.

Bele mós partisipa iha Forsa-Tarefa ne’e reprezentante Kaza Militár Prezidénsia Repúblika, Ministériu Negósiu Estranjeiru no Kooperasaun (MNEK), Ministériu Saúde (MS), Servisu Migrasaun, Autoridade Protesaun Sivíl, ANATL, Sekretariadu Komisaun Organizadora no organizmu sira seluk ne’ebé identifika relevante hodi integra iha Forsa-Tarefa konjunta ne’e.

Papa Vizita Timor-Leste iha setembru

Molok ne’e, Konferénsia Episkopál Timorense (CET, sigla protugés), sesta (12 abríl 2024) ne´e, ofisialmente anúnsia vizita pastorál Papa Francisco vizita Timor-Leste ne´ebé maiória Katólika ho populasaun maizumenus 96% ne´e iha setembru 2024.

Santu Padre nia Vizita Apostólika iha Timor sei hala’o iha loron 9 to’o 11 Setembru 2024.

Papa nia vizita Apostólika ida-ne’e sei sai eventu istóriku ida ba povu Timor, ne´ebé hein kle’ur ona prezensa Santu Padre Francisco nian iha rai doben Timor-Leste, rai ida -e’ebé nia povu simples sira hatene moris sira-nia orijuinalidade fiar nian iha Kristu Jesus.

Vizita ofisial ne’e, planeia antes ona iha tinan 2020 maibe tanba kauza husi Pandemia COVID-19 nian, mak vizita ne’e la konsege realiza.

Notísia relevante: Mari Alkatiri konsidera vizita Papa Francisco nu’udar grasa no bensaun ba povu 

Timoroan tomak nakonu ho sentimentu ksolok nian, agradese ba santidade nia konfirmasaun atu mai Timor no atu hatudu sinál gratidaun no domin Timoroan nian ba Santo Padre mak ekipa preparasaun husi parte Igreja nian serbisu makaas hela, hamutuk ho Nunsiatura Apostólika, atu prosesu preparasaun tomak hodi simu susesor São Pedro no Pastor Universal Kreda nian bele la’o ho di´ak.

Entretantu,  iha 28 fevereiru 2024, Governu Timor-Leste mós deside prevee orsamentu ho totál hamutuk juta $12 ba preparasaun vizita Papa Francisco mai Timor-Leste.

Fatin sira-ne´ebé Papa Francisco sei vizita durante ninia vizita pastoral iha Timor-Leste ne´e mak hanesan fatin Nunsiu Apostóliku iha Motael nu´udar rezidénsia ba Papa Francisco atu hela. Durante nia vizita ne´e

Papa Francisco sei vizita igreja Katedrál Imaculada da Conceição Dili ne´ebé sei utiliza hanesan fatin atu halo sorumutu ho padre no madre sira iha Timor-Leste, hahú hosi bispu, padre, madre no selu-seluk tan.

Nune’e mós Papa Francisco sei vizita Sentru Konvensaun Dili (CCD) hanesan fatin ba sorumutu entre Papa Francisco ho juventude Katólika iha territóriu nasionál, no sei vizita fatin istóriku Tasi-Tolu ne’ebé hili sai fatin atu atu selebra misa solene antes Papa Francisco husik hela Timor-Leste.

Notísia relevante: Governu no Igreja lansa sekretariadu vizita Amu Papa nian iha TL

Vizita Papa Francisco ida-ne´e nu’udar vizita Estadu dahuluk Papa Francisco mai Timor-Leste hafoin Timor-Leste restaura independénsia iha Tasi-Tolu, 20 maiu 2002, no hanesan vizita daruak hafoin Papa João Paulo II vizita Timor-Leste iha okupasaun Indonézia iha 12 outubru 1989.

Papa Francisco vizita nasaun 4 iha Asia no Oseania

Tuir portál ofisial Vatican News haktuir, Papa Francisco sei hala’ o nia vizita pastorál iha Indonézia, Papua Novaguine, Timor-Leste no Singapura iha 2-13 September 2024.

Papa Francisco simu konvite hosi Xefe Estadu no autoridade Igreja atu hala’o vizita pastorál ba da-43 ba estranjeiru. Tuir oráriu, Papa Francisvo sei vou hosi Roma iha 02 setembru no sei fila-fali ba Roma iha 13 setembru 2024.

Santu Padre sei hala’ o nia viajen dahuluk ba Jakarta-Indonézia, iha 03 setembru 2024 no iha Jakarta to’ o 06 setembru 2024. Populasaun Indonézia maiória Musulmanu ne´ebé boot iha mundu no Katólika kuaze populasaun juta ualu (8) ka ekivalente 3,1%.

Notísia relevante: PM Xanana garante seguransa ba vizita Amu Papa Francisco mai Timor-Leste

Hafoin ne´e, Papa Francisco sei hala’o vizita pastorál ba Port Moresby, Papua Novaguine no Vanimo iha 06-09 setembru 2024. Populasaun iha Papua Novaguine 32% sarani Katólika ka kuaze ema hamutuk juta rua.

Husi ne´eba, Papa Francisco sei vizita Dili-Timor-Leste durante loron tolu ne´ebe sei hahú hosi iha 09-11 setembru 2024. Timor-Leste maiória relijiaun Katólika ho populasaun 96% ka ema hamutuk juta ida.

Hafoin ne´e, Papa Francisco sei vizita Singapura durante loron tolu hahú hosi 11-13 september 2024. Maizumenus iha sarani Katólika hamutuk 395.000 ne´ebé hela iha Singapura ne´e reprezenta kuaze populasaun 3%.

Entretantu, Papa Francisco halo vizita pastorál mai Timor-Leste ne´e sei akompaña husi bispu no kardeál hamutuk 55 no jornalista internasionál hamutuk ema na’in-85.

Notísia relevante: IgrejaTimor hili tema “A vossa fé seja a vossa Cultura”  durante vizita Amu Papa

Jornalista: Hortencio Sanchez

Editór: Florencio Miranda Ximenes