Top

Juiz Administradór Baucau João Riveiro muda mai TJPID

Prezidente Tribunál Rekursu, Deolindo dos Santos. Imajen Tatoli /Egas Cristóvão

DILI, 30 abríl 2024 (TATOLI) – Prezidente Tribunál Rekursu Deolindo dos Santos, dehan Konsellu Superiór Majistratura Judisiáriu rekomenda ba Prezidente Tribunál Rekursu hodi bolu hikas atuál Juiz Administradór Baucau João Riveiro hodi mai servisu fali iha Tribunál Judisiál Primeira Instánsia Dili (TJPID).

“Konsellu rekomenda ba Prezidente Tribunál Rekursu hodi muda fali atuál Juiz Administradór Baucau João Riveiro mai fali iha Dili hodi reforsa servisu Tribunál Primeira Instánsia Dili no ha’u deside ona hodi muda atuál Juiz Administradór Baucau, João Riveiro mai fali iha Dili hodi ajuda servisu Juiz nian iha Dili”, Deolindo dos Santos, hateten ba jornalista sira iha Timor Plaza tersa, ohin.

Nia esplika, Konsellu halo desizaun ne’e tanba haree ba Juiz AMF ne’ebé antes ne’e halo kna’ar iha Tribunál Judisiál Primeira Instánsia Dili ne’ebé husu ezonerasaun ba Konsellu hodi deside aprova nia ezonerasaun.

“Situasaun ida halo Juiz sira iha Tribunál Primeira Instánsia Dili menus rekursu ida, tanba ita-nia Juiz ne’ebé ezonera ona iha loron hirak liubá ne’e, antes ne’e nia halo nia servisu hanesan Juiz  iha Tribunál Dili, nia ka’er prosesu (kazu) hamutuk 300, entaun atu kontinua prosesu sira ne’e ba oin, presiza Juiz ida mak tenke substitui nia hodi bele atende kazu 300 ne’e ba oin, tanba ne’e mak ita bolu fali atuál Juiz Administradór Baucau João Riveiro hodi mai priénse fali Juiz ne’e nia fatin hodi kontinua atende prosesu sira ne’e ba oin”, nia adianta.

Deolindo hateten, funsaun Juiz Administradór Baucau ne’e em-ezersísiu de’it ona hodi hein Konsellu deside no propoin ba Prezidente Tribunál Rekursu nomeia fila fali Juiz Administradór Baucau foun.

“Agora Juiz Administradór Baucau ne’e ho funsaun internu de’it no agora kargu ne’e asume hosi ita-nia Juiz balun, maibé tempu badak ita sei halo fali nomeasaun foun ba Juiz Administradór Baucau foun”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!