MOP halo levantamentu uma estadu iha Baucau
BAUCAU, 30 abríl 2024 (TATOLI) – Ministériu Obra Públika liuhusi Diresaun Jeral Abitasaun, Urbanizmu no Diresaun Nasionál Habitasaun halo levantamentu uma estadu iha Baucau.
Diretor Nasionál Habitasaun, Octavio Perreira Monteiro Marques esplika, atu implementa polítika dezenvolvimentu, MOP hamutuk ho Autoridade Munisípiu Baucau planeia halo levantamentu ba dadus eransa sira, liuliu uma no edifísiu estadu ne’ebé husik hela durante okupasaun Portugés no Indonézia ne’ebé atuál okupa husi komunidade no balun abandonadu hela.
“Ami sei foti dadus iha Baucau ba abitasaun tempu Portugés no Indonézia husik hela ne’ebé komunidade agora okupa,” Diretór Nasionál Habitasaun hateten iha Vila Nova, tersa ne’e.
Tuir planu ekipa levantamentu sei halo identifikasaun no foti dadus patrimóniu estadu hirak-ne’e durante loron-sia iha terrenu hanesan identifika kondisaun uma nune’e atu enkaixa ba projetu pilotu iha tinan-oin no planu melloramentu abitasaun iha futuru.
Konstitusaun Republika Demokrátika Timor-Leste (K-RDTL) iha artigu 58 katak, ema hotu iha direitu ba nia-aan no familia atu iha uma ho nia dimensaun adekuada.
Governu liuhusi Ministériu Obra Públika bazea ba dekretu lei Númeru 50/2023, loron-25 Agostu no orgániku MOP iha artigu 19 fo kompeténsia ba Diresaun Nasional Abitasaun atu ezekuta knaar hodi koordena no evalua polítika ho entidade relevante iha kompeténsia legál, no promove elaborasaun no ezekusaun polítika nasional abitasaun no akompaña ezekusaun programa.
“Ami laiha planu atu hasai, maibé ami foti lai dadus haree kondisaun uma, tau ba data hodi halo melloramentu,” Octavio Marques akresenta.
Autoridade Suku Vemasse Tasi, Carlos Freitas, prontu kopera ho ekipa Diresaun Jeral Habitasaun, Ubanizmu no Diresaun Nasionál Habitasaun bainhira atu halo levantamentu dadus ba uma no edifisiu Estadu nian iha área Suku Vemasse Tasi.
“Balun okupa, balun husik deit, uma ne’e estadu nian, maibé rai ne’ebé uluk Portugés no Indonézia foti ne’e obrigatóriu,” Carlos Freitas hateten.
Jornalista : Natalino Belo
Editór : Evaristo Soares Martins
