Selebra “May Day”, PR Horta husu asegura no dignifika traballadór sira
DILI, 30 abríl 2024 (TATOLI)– Prezidente Repúblika (PR), José Ramos Horta, rekoñese traballadór nia kontribuisaun boot ba dezenvolvimentu ekonómia Timor-Leste nian.
“Loron 01 fulan-Maiu mak data signifikante ida bainhira ita fó onra no selebra kontribuisaun husi traballadór sira iha mundu tomak. Loron Internasionál Traballadór nian hanesan oportunidade ida ba traballadór sira iha nivél globál atu hamutuk iha solidariedade, ita halibur hamutuk hodi selebra ita-nia rezultadu servisu no rekoñese progresu ne’ebé ita halo hodi hadi’a kondisaun servisu nian,”Xefe Estadu hateten liuhosi nota komunikadu ne’ebé Agência TATOLI asesu iha portal Presidensiál Repúblika, ohin.
Governu Timor-Leste selebra loron mundiál traballadór ka “May Day” ne’e ho tema “Promove justisa sosiál no traballu dignu ba ema hotu iha Timor-Leste, harí futuru ida ne’ebé di’ak liu bá traballadór sira no kria mundu traballu ne’ebé valorizadu proteje no hetan oportunidade ba moris di’ak”.
Nune’e, Xefe Estadu konsidera loron Internasionál Traballadór nian ne’e, ema hotu tenke hateke ba oin ho orgullu ba progresu ne’ebé hetan ona hosi traballadór sira iha Timor-Leste.
“Ami rekoñese esforsu boot husi traballadór hotu-hotu ne’ebé kontribui ba dezenvolvimentu ekonómiku no sosiál iha ita-nia nasaun joven ida ne’e,” nia katak.
Nune’e, PR Horta dehan: “Maibé, sei iha servisu atu halo. Ita tenke garante katak traballadór hotu-hotu iha empregu ne’ebé seguru, kondisaun digna no iha kapasidade atu sustenta sira-nia família ho adekuadu. Ita tenke kontinua defende direitu traballadór sira-nian no asegura oportunidade ne’ebé hanesan ba hotu-hotu ka ema hotu.
Ohin loron, ema hotu selebra serbisu maka’as, dedikasaun no sakrifísiu sira husi traballadór sira iha nasaun ne’e. Traballadór sira sai nu’udar kabas ba ekonomia no dezenvolvimentu Timor-Leste nian.
“Liu husi ita-nia servisu maka’as no esforsu loroloron nian, ita-nia nasaun sei la’o ba oin. Unidu iha ita-nia esforsu sira, ita bele harii Timor-Leste ida-ne’ebé forte liu, prósperu liu, no ida-ne’ebé ekuitativu liu ba traballadór hotu-hotu no sira-nia família,” hatete.
Ema númeru ida iha Timor-Leste ne’e dezeju ba traballadór sira hotu atu kontente ba selebrasaun loron traballadór nian, nakonu ho pás no ksolok, no hein katak tinan oin mai sei lori prosperidade no progresu barak liután ba traballadór hotu.
Notísia relevante: Governu koordena ho CCI-TL-KSTL halo estudu kle’an molok hasa’e saláriu mínimu
Jornalista: Hortencio Sanchez
Editór : Florencio Miranda Ximenes
