DILI, 30 abríl 2024 (TATOLI) – Prezidente Tribunál Rekursu, Deolindo dos Santos, halo ona koordenasaun ho Konsellu Administrasaun Fundu Infraetrutura (KAFI) atu koalia fila fali dezeñu ba konstrusaun edifísiu Supremu Tribunál Justisa (STJ).
“Dezeñu ba konstrusaun edifísiu Supremu Tribunál Justisa, antes ne’e, Konsellu Administrasaun Fundu Infraetrutura sira anula ona, maibé ami husu fali sira atu haree fila fali maibé ida-ne’e kompeténsia sira-nian atu haree tanba orsamentu ba konstrusaun ba Supremu Tribunál Justisa ne’e osan preve iha KAFI”, Deolindo dos Santos, hateten ba jornalista sira iha Timor Plaza tersa, ohin.
Nia dehan, orsamentu ba konstrusaun Supremu Tribunál Justisa tinan-tinan Tribunál Rekursu sempre preve.
“Ita sempre preve osan ba konstrusaun Supremu Tribunál Justisa, orsamentu ne’e ita preve iha KAFI”, nia adianta.
Deolindo hateten, Tribunál Rekursu preve millaun $ ida-resin ba konstrusaun Supremu Tribunál Justisa maibé orsamentu ne’e preve iha KAFI.
Jornalista: Natalino Costa
Editór : Zezito Silva
