DILI, 02 maiu 2024 (TATOLI) – Komandante Jerál Polísia Nasionál Timor-Leste (PNTL) Komisáriu Jerál Polísia, Henrique da Costa, dehan kazu hosi pesoál Servisu Nasionál Intelénsia (SNI) ne’ebé tiru joven ida iha Munisípiu Covalima, daudaun ne’e, submete ona ba prosesu investigasaun.
Insidente ne’e akontese, iha kuarta (01/5), horseik maizmenus tuku 20:00, iha pesoál ida hosi Servisu Nasionál Intelijénsia ho arma tiru kanek joven ida iha Munisípiu Covalima ho motivu hosi kazu ne’e seidauk hatene lolos.
“Ita foin hetan mak informasaun inisiál de’it katak iha insidente ida iha Colvalima, envolve hosi ita-nia pesoál servisu sekretu ida, maibé motivu ne’e ita seidauk hetan tanba sei iha hela prosesu depois hetan mak Portavóz Komandu PNTL sei aprezenta ba ita bo’ot”, Henrique da Costa, hateten ba jornalista sira hafoin simu vizita delegasaun Badan Nasional Narkotika (BNN) Repúblika Indonézia iha Kuartel Jerál PNTL Caicoli, kinta ne’e.
Komisáriu Jerál PNTL ne’e hateten, hafoin akontesimentu, Komandu Jerál PNTL orienta kedas Komandante Munisípiu Covalima Superintendente Polísia Calisto Gonzaga hodi tún ba terenu, observa fatin kontesimentu.
“Depoisde insidente, ha’u hetan kedas kontatu hosi Komandante Munisípiu Covalima no depoisde ida-ne’e ita orienta kedan Komandu Munisípiu Covalima hodi konfirma kona-ba informasaun ne’ebé mak iha. Hafoin Komandu Munisípiu Covalima tún ba terenu, nia haree iha duni akontesimentu iha fatin rua, nia ho nia membru sira normaliza kedan situasaun iha fatin ne’ebá no nia identifika duni katak iha duni membru ida servisu sekreta mak envolve iha insidente ne’e”, nia informa.
Henrique hateten, hafoin akontesimentu ne’e, laiha asaun ne’ebé pertuba orden públika, tanba Komandu PNTL Covalima ho nia membru sira asegura tiha kedan fatin akontesimentu.
“KomanduMunisípiu normaliza kedas situasaun no situasaun iha fatin akontesimentu aseguradu. No depois ida-ne’e, ita mós informa kedan situasaun ne’e ba Diretór Jerál Servisu Nasionál Intelijénsia ho mós Xefe Estadu Maiór Jenerál F-FDTL para sira mós hatene”, nia adianta.
Komisáriu ne’e la hatene Pesoál SNI ida ne’ebé mak envolve los iha insidente ne’e tanba polísia sei halo hela prosesu investigasaun ba kazu ne’e.
“Ha’u hakarak hateten dala ida tán, ba kazu ida-ne’e polísia agora sei halo hela prosesu investigasaun”, nia konklui.
Jornalista: Natalino Costa
Editór : Zezito Silva
