PNTL-BNN Indonézia haforsa kooperasaun ba prevensaun ilísitu droga

DILI, 02 maiu 2024 (TATOLI) – Komandante Jerál Polísia Nasionál Timor-Leste (PNTL), Komisáriu Jerál Henrique da Costa, dehan Komandu PNTL kompromete mantein hodi haforsa kooperasaun ho Badan Narkotika Nasional Repúblika Indonézia iha área prevensaun ba kazu ilísitu droga iha fronteira.
“Ohin ita-nia maluk BNN sira halo sorumutu ida ho Komandu Jerál PNTL no sorumutu ida ohin ne’e laos buat foun maibé realiza ona tinan sira liu ba kotuk ne’ebé mak halo hosi Komandante Jerál sesante Faustino da Costa no Loguinhos. Liuhosi sorumutu ne’e ita koalia kona-ba kooperasaun entre PNTL no BNN ba atendimentu ba droga ninian. Ita mós haree hela hodi renova fila fali akordu ne’ebé mak iha, atu nune’e ba oin bele aumenta tan fahe informasaun iha fronteira oinsá hamutuk hodi haree no prevene sasan droga sira tama mai Timor-Leste no hosi Timor-Leste ba Indonézia. Entaun liuhosi kooperasaun sira ne’e mak ita tenke servisu hamutuk atu fahe informasaun ba sira oinsá atu ita asegura mós fronteira”, Henrique dehann hafoin simu vizita delegasaun BNN Repúblika Indonézia iha Kuartel Jerál PNTL Caicoli, kinta ne’e.
Henrique hateten, Komandu PNTL hamutuk BNN kontinua koopera tanba antes ne’e iha ona akordu atu fó kapasitasaun ba membru PNTL sira hodi prevene krime droga nian.
“Ita mós antes ne’e iha ona akordu ho Badan Narkotika Nasionál no akordu ida-ne’e uluk sira oferese mós formasaun lubuk ida ba PNTL, partikularmente kapasitasaun membru PNTL kona-ba droga ninian. PNTL sempre hamutuk ho sira hodi reune iha liña fronteira ne’ebé mak realiza iha Batugade inklui mós ho ita-nia Servisu Migrasaun no Alfándega sira sempre realiza enkontru. Entaun ita kontinua haforsa kooperasaun ida-ne’e katak buat ruma iha sira-nia fronteira, sira sempre komunika mai atu ita halo medida prevensaun no atuasaun ruma”, nia adianta.
Komisáriu Jerál PNTL ne’e hateten, PNTL ninia komunikasaun no kordenasaun durante ne’e ho BBN ne’e di’ak tebes.
“Ita bo’ot sira haree tinan hirak ba kotuk, ema lori matéria bázika atu halo ba ai-moruk droga X-Tasi nian tama hosi ita-nia rai ba Indonézia maibé ita konsege halo apreensaun tanba nia servisu hamutuk ho BNN di’ak tebes no ita hakarak kontinua kooperasaun sira ne’e hodi prevene buat sira labele akontese tán”, nia dehan.
Iha fatin hanesan, Xefe BNN, Komisaris Besar Polisi (Kombes Pol), Marthinus Hukom, hateten BNN nia komitiva mai hasoru Komandante Jerál PNTL Komisáriu Jerál Polísia Henrique da Costa, atu harii relasaun ida-ne’ebé la’o daudauk ona dezde tempu naruk entre Indonézia no Timor-Leste.
“Ita ko’alia kona-ba pasu tuirmai mak harii kooperasaun, buat ne’ebé importante liu mak atu harii konfiansa iha istória, segundu mak oinsá ita haree katak ameasa ne’ebé produtór droga sira-ne’e sempre uza dalan liña tradisionál ne’ebé ita hatene katak Indonezia iha fronteira ho Timor-Leste nian, pelumenus kilómetru 149 no tuirmai ita mós iha fronteira iha tasi ne’ebé ita hasoru illa sira ne’ebé ita mak iha”, nia afirma.
Nia louva PNTL nia esforsu ba prevensaun droga iha fronteira no parte BNN sei kontinua apoia PNTL ba prevensaun krime droga sira iha fronteira.
“Ami iha ona ligasaun hosi tempu antigu no dalan tradisionál iha área fronteira nian atu ita bele proteje ita-nia nasaun husi ameasa tráfiku droga nian iha sosiedade estruturál ka kulturál no sosiál iha fronteira”, nia konklui.
Jornalista: Natalino Costa
Editór : Zezito Silva

