DILI, 02 maiu 2024 (TATOLI) – Portavós Organizasaun Sagrada Família (OSF), Abrão José Pereira, husu ba Governu atu trata sidadaun sira ho dignu molok halo despezu administrativu.
“Pozisaun Organizasaun Sagrada Família nia laos kontra dezenvolvimentu iha rai ida-ne’e, ba dezenvolvimentu ita tenke apoia, buat ne’ebé Governu halo, Sagrada Família la kesiona, maibé ami husu atu Governu trata nia sidadaun sira ne’e ho di’ak molok halo despezu administrativu hasoru nia povu sira”, Abrão José Pereira hateten liuhosi konferénsia imprensa ne’ebé mak halao iha sede Organizasaun Sagrada Família Fatuhada, kinta ne’e.
Nia dehan, Governu tenke halo planu adekuadu ba dezenvolvimentu liuliu tenke iha sira mekanizmu ba realokasaun komunidade.
“Governu tenke dezeña polítika ida ba realokasaun liuliu ba ema hirak ne’ebé okupa espasu públiku, karik Governu atu halo despezu administrativu hasoru sira, primeiru, Governu tenke kria kondisaun hafoin hasai sira, tenke fó subsídiu ba sira ou prepara fatin ne’ebé dignu ba sira hodi sira bele ba hela’’, nia afirma.
Nia dehan, OSF husu ba Governu atu labele intimida komunidade sira bainhira halo despezu administrativu.
“Ami husu Governu atu labele uza maneira intimidasaun hasoru komunidade bainhira halo despeze administrativu. Kuandu it aba ho maneira aprosimasaun mak buat hotu sei la’o di’ak”, nia konklui.
Jornalista: Natalino Costa
Editór : Zezito Silva
