DILI, 03 Maiu 2024 (TATOLI) – Servisu Unidade Kuarentena no Biosseguransa, Ministériu Agrikultura, Pekuária, Peska no Floresta halo ona destruisaun ba ikan, na’an no ai-fuan hamutuk kilógrama 112,06 ne’ebé Kuarentena halo apreensaun iha fulan-Abríl.
Xefe Subunidade Kuarentena Animál, Mário Francisco Amaral, hateten asaun ne’ebé Kuarentena halo hodi apreende produtu ne’ebé tama mai Timor-Leste ne’e atu kontrola no proteje hodi hamenus introdusaun moras iha país. Aleinde na’an sira, Kuarentena mós halo destruisaun ba produtu planta sira hanesan ai-funan no ai-fuan, ne’ebé hetan mós apreensaun.
“Sasán sira ita destrui ne’e kompleta ho ninia dadus sira ne’ebé Servisu Kuarentena rekolla”, Mário Amaral dehan ba jornalista sira iha edifísiu Kuarentena, iha Aeroportu Internasionál Nicolau Lobato Comoro, ohin.
Xefe Subunidade Kuarentena ne’e esplika katak husi produtu kilógrama 112.06 ne’ebé Kuarentena halo ona destruisaun ne’e, planta hamutuk 85,66kg, kompostu ai-fuan sira inklui ai-moruk tradisionál, koto, ai-funan, depois produtu animál akuátiku iha 19,4kg mak hanesan ikan no boek no produtu animál terrestre 7kg mak hanesan na’an-fahi no karau.
Unidade Kuarentena foti sasán sira ne’e, tanba laiha dokumentu no la hetan autorizasaun husi parte Kuarentena no produtu sira ne’ebé hetan apreensaun ne’e hatama husi pasajeiru indíviduu sira mak hanesan ema estranjeiru inklui timoroan rasik.
“Sasán ne’ebé pasajeiru sira hatama ne’e ho kuantidade ki’ik. Parte Kuarentena foti asaun hodi apreende sasán sira ne’e, maibé fó tempu loron tolu ba sira atu hatama rekursu ne’ebé tenke mai ho dokumentu legál sira, kuandu loron tolu liu maka laiha ida mai aprezenta konsidera sasán sira ne’e ilegál no tenke tama ba prosesu destruisaun”, salienta.
Iha fatin hanesan, Diretór Unidade Kuarentena no Biosseguransa, Manuel da Costa, realsa katak produtu sira ne’ebé halo destruisaun ne’e tama liu husi aeroportu Comoro no sasán sira ne’e laiha dokumentu legál, entaun tenke halo kedan apreensaun nune’e labele fó risku ba ema seluk nia saúde.
Diretór ne’e husu ba pasajeiru sira ne’ebé tama no sai iha territóriu atu kumpre regra Kuarentena nian. “Karik fila mai Timór hakarak lori sasán ruma kona-ba produtu planta, animál sira maka hanesan ikan, na’an ruma tenke iha dokumentu legál, nune’e bele garante katak produtu sira ne’e iha duni kondisaun ne’ebé di’ak no bele konsome. Kuandu laiha dokumentu legál di’ak liu lalika hatama sasán sira mai Timór tanba bele afeta ba ema seluk ninia saúde no Kuarentena sei la autoriza”, afirma.
Notísia relevante: Kuarentena destrui na’an importadu kilograma 36,21
Jornalista: Tomé Amado
Editora: Maria Auxiliadora
