DILI, 03 maiu 2024 (TATOLI) – Komandante Unidade Polísia Marítima (UPM), Superintendente Polísia, Eugénio Pereira, dehan ekipa UPM halo vizilánsia iha tasi ibun Liquiça hodi asegura joven ida ho inisiál MML tanba deskonfia halo tranzasaun illegál ba sasan bebidas Cocacola ho kaixa 128, ho ró, hosi Atapupu-Indonézia mai Timor-Leste.
Kazu ne’e akontese iha kinta (2/5) horseik oras tuku 04:00 madrugada bainhira sidadaun ho inisiál MML ba tasi ibun Liquiça atu foti sasan sira ne’ebé sidadaun ne’e hatama hosi Atapupu Indonézia.
Maibé momentu ne’e, sidadaun lakonsege foti tanba ekipa UPM ne’ebé destaka iha tasi ibun Liquica konsege deteta movimentu sidadaun ne’e nian, nune’e UPM asegura kedan sidadaun ne’e tanba deskofia hatama bebidas kaixa 128 hosi Atapupu-Indonézia mai Timor-Leste.
“Ita-nia ekipa UPM ne’ebé mak halo vizilánsia iha Liquiça horseik madrugada iha quatro oras konsege asegura joven ida ho inisiál MML tanba deskonfia halo tranzasaun ilegál ba sasan bebidas Cocacola kaixa 128 hosi Atapupu-Indonézia mai Timor-Leste”, Superintendente Polísia, Eugénio Pereira hateten ba TATOLI iha nia kna’ar fatin Sionál, sesta ne’e.
Nia dehan, hafoin ekipa asegura tiha sidadaun ne’e, ekipa UPM mós halo kedan apreesaun ba sasan sira iha ne’ebé iha ró laran.
“Tuir informasaun ne’ebé mak ekipa sira informa mai ha’u iha terenu katak sidadaun timoroan ne’e atu ba foti sasan iha tasi ibun Liquiça ne’ebé nia hatama liuhosi Atapupu, bainhira ró ne’ebé lori sasan sira ne’e para iha tasi ibun atu hatuun sasan hosi ró no hafoin hatuun hotu sasan sira ne’e no ró ne’e fila nune’e ekipa deskonfia kedan no halo kedan intervensaun hodi asegura sidadaun ida no sasan sira tanba hatama la ho dokumentu komprovativu”, nia dehan.
Eugenio hateten, UPM komunika kedan ba Ministériu Públiku hodi halo identifikasaun ba sidadaun ne’ebé hatama sasan.
“Ita konklui ona identifikasaun ba sidadaun ne’e no ami entrega ona ba Departamanetu Investigasaun Kriminál (DIK) Nasionál atu kontinua prosesa sidadaun ne’e ba oin”, nia informa.
Komandante ne’e hatutan, sasan ne’ebé mak ekipa UPM halo apreensaun mak bebidas Cocacola kaixa 128, asukarada ho saku 48, inklui ai-kameli kaixa ualu ne’ebé sidadaun MML esporta fali ba Indonézia.
“Sasan sira ne’e sai hanesan evidénsia ida ba objetu krime, ita sei entrega ba Departamentu Investigasaun Kriminál Nasionál atu halo prosesu investigasaun ba oin”, nia konklui.
Jornalista: Natalino Costa
Editór : Zezito Silva
