iklan

HEADLINE, SEGURANSA

PNTL detein suspeitu ida envolve konfrontu iha Ai-Mutin

PNTL detein suspeitu ida envolve konfrontu iha Ai-Mutin

Logotipu PNTL

DILI, 05 maiu 2024 (TATOLI) – Komandante Polísia Nasionál Timor-Leste (PNTL) Munisípiu Dili Superintendente Polísia, Orlando Gomes, dehan PNTL detein suspeitu ida ho inisiál TCC tanba envolve iha kazu konfrontu ne’ebé akontese iha área Ai-Mutin, Suku Comoro, Postu Administrativu Dom Aleixo, Munisípiu Dili, iha sesta foin lalais ne’e.

“Iha sesta-feira (3/5) kalan por volta 11:00 kalan, mosu konfrontu entre joven sira iha área Ai-Mutin, tanba kauza hosi joven sira provoka to’o hamosu konfrontu entre joven iha área ne’ebá. Ita-nia komunidade sira informa kedan ba Eskudra Dom Aleixo no ekipa patrolla Dom Aleixo no halo kedan intervensaun ba situasaun iha fatin ne’ebá no iha momentu ne’e polísia konsege asegura suspeitu nain ida ho inisiál TCC ho fraglánte delitu, tanba deskonfia nu’udar autór prinsipál ba kazu konfrontu ne’e”, Orlando Gomes hateten iha nia kna’ar fatin Komandu PNTL Dili Caicoli, domingu ne’e.

Gomes hateten, suspeitu TCC oras ne’e daudaun detein ona iha sela Komandu PNTL Munisípiu Dili, hodi kumpre detensaun durante oras 72, molok submete ba prosesu interogatóriu dahuluk iha Tribunál Judisiál Primeira Instánsia Dili.

Komandante Munisípiu Dili ne’e informa liután katak, iha konfrontu ne’e rezulta ema ida hetan kanek grave maibé agora daudaun vítima halo ona tratamentu iha ospitál no fila ona ba uma, enkuantu uma no sasan komunidade nian lahetan estragu, tanba momentu akontese konfrontu PNTL eskuadra Dom  Aleixo halo kedan intervensaun tanba ne’e situasaun lao di’ak no kontroladu.

Jornalista: Natalino Costa

 Editór : Zezito Silva

iklan
iklan

Leave a Reply

iklan
error: Content is protected !!