Abríl : PNTL rejista asidente tráfegu 174, na’in-sia lakon vida

DILI, 07 maiu 2024 (TATOLI) – Xefe Departamentu Tránzitu Seguransa no Rodoviária Nasionál (DTSRN) Asistente Superintendente Polísia, Luis da Costa, hateten hahú iha loron 01 to’o 30, fulan-Abríl, departamentu tránzitu rejista kazu asidente tráfegu hamutuk 174 no ema nain-sia mak lakon vida.
“Fulan kotuk, ita konsege rejista kazu asidente tráfegu hamutuk 174, hosi númeru ne’e iha ema 135 mak kanek kmaan, ema 30 mak kanek gave no na’in-sia mak lakon vida”, Luis hateten ba jornalista sira iha kna’ar fatin, Komandu Jerál PNTL Caicoli, tersa ne’e.
Luis hateten, hosi kazu asidente tráfegu sira ne’e, Departamentu Tránzitu Seguransa Rodoviária Nasionál (DTSRN) submete ona kazu asidente tráfegu hamutuk sia ba Tribunál, iha kazu 66 mak sei iha prosesu investigasaun, DTSRN halo hela investigasaun ba ida-ne’e no iha kazu hamutuk 97 mak Departamentu Tránzitu Seguransa Rodoviária Nasionál rezolve tuir dalan família, enkuantu iha kazu asidente tráfegu rua mak PNTL enkamiña ona ba Ministériu Públiku hodi submete prosesu ne’e ba Tribunál.
“Hosi polísia nia haree, númeru asidente tráfegu ne’e sae makas tuir ami nia observasaun, fatór ne’ebé kontribui ba asidente sira ne’e mak mai hosi konsiénsia ema nian, dala ruma ita kondús motór no karreta hodi halai arbiru no ho kondisaun lanu, fatór sira hanesan ne’e mak konstribui ba asidente tráfegu”, nia dehan.
Nia husu ba motorista sira bainhira kondús karreta no motór tenke ho kuidadu tanba sai ba fatin ruma ho karreta no motór tenke pasa revista uluk kodisaun karreta no motór molok halo viajen.
Jornalista: Natalino Costa
Editór : Zezito Silva

