DILI, 07 maiu 2024 (TATOLI) – Membru hosi Komandu Polísia Nasionál Timor-Leste Munisípiu Dili hamutuk 83 deklara hodi sai hosi Grupu Arte Marsiál no Arte Rituál (GAR) liuhosi juramentu ho objetivu atu servi de’it ba institusaun PNTL, povu no nasaun.
Membru Komandu PNTL Dili 83 halao uluk kompromisu onra atu entrega kedan atributu arte marsiál no arte rituál ne’ebé sira antes ne’e hola parte ba.
Hafoin ida-ne’e, membru sira jura ba bandeira nasionál nu’udar jestu afirmasaun katak membru PNTL ofisialmente hasees aan hosi GAM no GAR hodi servi institusaun PNTL ba povu no nasaun.
Membru PNTL hirak ne’e kompostu hosi ofisiál ho postu asistente Inspetór 10 no inspeór xefe na’in-haat no restante seluk mai hosi postu serjentu no ajente polísia.
Membru hirak ne’e, mai hosi Grupu Arte Marsiál no Arte Rituál hanesan Persaudaraan Setia Hati Terate (PSHT) iha 41, Ikatan Kera Sakti (IKS) 18 no Kmanek Oan Rai Klaran (KORK) ualu, enkuantu hosi Grupu Arte Rituál 77 iha ema 13.
Komandante PNTL Munisípiu Dili Superintendente Xefe Polísia, Orlando Gomes, tersa ne’e, iha komandu Dili, hateten komandu realiza serimónia entrega atributu Grupu Arte Marsiál no Grupu Arte Rituál hodi deklara hasees aan hosi GAM no GAR hodi servi de’it povu no nasaun.
“Ohin imi halo ona kompromisu hodi ohin ba oin ita afirma aan halo servisu tuir de’it lei no ordem hodi servi ba Estadu servi no ba povu”, Orlando Gomes dehan.
Nia husu ba membru PNTL sira atu servisu ho profisionál hodi halo atendimentu ba povu no nasaun tuir Konstitusaun RDTL artigu 147 hodi garante situasaun seguransa iha Munisípiu Dili.
Iha fatin hanesan, Komandante Jerál PNTL, Komisáriu Jerál Polísia, Henrique da Costa, husu ba membru PNTL atu servisu povu ho nasaun ho profisionál.
“Ba membru sira, imi tenke servi povu no nasaun ho profisionál. Hatudu imi nia profisinál bainhira halo atuasaun sira. Imi tenke harii komunikasaun ne’ebé di’ak entre imi ho komunidade sira iha terenu hosi komunikasaun sira mak sei haforsa ita-nia servisu ba futuru”, nia afirma.
Nia dehan, PNTL tenke hatudu atendimentu ne’ebé di’ak, hatudu performansia ne’ebé di’ak ba povu bainhira halao servisu iha terenu.
“Profisionalizmu ne’e laos hanesan baibain, ema koalia ne’e lae, maibé profisionalizmu ne’e mai hosi ita-nia komunikasaun no ita-nia maneira atedimentu sira hodi ajuda”, nia adianta.
Ministru Interiór (MI), Francisco da Costa Guterres, hateten membru PNTL 83 hosi Komandu PNTL Dili deside aan sai hosi Grupu Arte Marsiál no Arte Rituál ne’e nudar kompromisu X Governu Konstitusionál desde iha 7 dezembru 2023 hodi hateten katak membru PNTL hotu tenke kompromete aan hodi hasees aan hosi atividade GAR no GAR.
Agosto Deker kongratua ba membru PNTL ne’ebé durante ne’e ho vontade deklara hodi hasees aan hosi GAM no GAR.
“Ha’u-nia kongratulasaun ba imi ho imi-nia vontade ida-ne’e, ita marka pasu dala ida tán tanba ho asaun ida imi halo mak ohin hatudu katak tempu ona PNTL hatudu profisionál hodi servisu ba povu no nasaun hodi garante seguransa ba povu”, nia konklui.
Jornalista: Natalino Costa
Editór : Zezito Silva
