DILI, 08 maiu 2024 (TATOLI) – Aimou FC susesu iha nia jornada hodi manán adversariu FC Vila-Vista ho rezultadu 2-1 iha jogu kontinuasaun kopa Maun Boot Kay Rala Xanana Gusmão ne’ebé realiza iha Estádiu Munisipál Dili, kuarta ne’e.
Bainhira jogu hahú ekipa rua lansa kedan kontra no atake ba malu tuir tékniku no abilidade ekipa idaidak nian ho objetivu buka golu. Iha jogu ne’e ekipa rua jatudu jogu ho ofensivu ka pasa bola loke.
Klube identíku husi Munisípiu Viqueque, Aimou lansa atake ne’ebé makas maibé Vila-Vista tenta hamate ho tékniku ne’ebé iha hodi halo Aimou sente difisíl atu ultrapasa liu grande área Vila-Vista nian.
Alende ne’e klube istimadu husi Munisípiu Liquiça Vila-Vista mós hatudu jogu ne’ebé bonitu halo finta bola ba mai, maibé Aimou ho kbiit ne’ebé iha tenke hamate jogu ne’ebé Vila Vista halo.
Jogu sai manas liutan tanba anima husi adeptus sira ne’ebé tur nahe-aan iha tribun leten ho lian makas fó suporta másimu ba sira nia ekipa favoritu.
Jogu haku’ur ba minutu 8, bola barullu iha lina-oin Vila-Vista nian jogadór Aimou lansa sutu kona liu jogadór Vila-Vista nia liman iha los grande área árbitru deside fó keda penalidade ba Aimou hodi sutu livre. Iha sutu livre ne’e ezekuta husi jogadór Deonizio Lopes (7) halo Guarda Rede Vila-Vista so’e aan sala ikus bola tama liu rede laran hodi hatur rezultadu ba 1-0.
Golu ne’e halo klube husi Suku Ulmera Vila-Vista tenke esforsu liutan, maibé esforsu hirak ne’e hela de’it hanesan esforsu tanba la prodús golu ruma maske hatudu jogu ne’ebé extraordinariu.
Ho atake ne’ebé Vila-Vista alias Soke-Rai Susar halo, Aimou mós la nonok de’it, tenke halo defensivu hodi salva ateke ne’ebé Vila-Vista lansa. Husi defensivu ne’e hatudu duni provas katak Vila-Vista susar atu ultrapsa hodi les rede Aimou. Ikus iha minutu 29 jogadór Aimou Mario Kefi (21) hatudu jogu ne’ebé brillante hodi les tan golu uda muda rezultadu ba 2-0.
Golu ne’e hanesan golu ikus ba ekipa rua iha tempu primeira parte tanba árbitru tenke deside jogu pauza hodi deskansa minutu 10 depois kontinua hikas.
Semo ba segunda parte ekipa rua nafatin sadik malu hodi lansa kontra no atake ne’ebé brillante. Vila-Vista halo mudansa ba nia jogu iha parte klaran nian, ikus iha duni rezultadu signifikativu tanba minutu 47 jogadór Turibio Padua konsege responde golu ida hodi nakfilak rezultadu ba 1-2.
Ho golu ne’e halo Aimou iha emosaun makas lansa kontra ne’ebé makas maibé labele responde golu ruma tanba Vila-Vista halo presaun makas iha liña oin.
Vila-Vista nia kontra atake iha oportuniade barak maibé avansadu la ezekuta ho di’ak ikus sutu barak la kona iha alvu, barak liu salva husi Guarda rede obriga rezultadu mantein ho 2-1.
Ho jogu ne’ebé iha armada rua esfirsu makas, Aimou tenta atu hatama tan golu bele muda rezultadu dook liutan. Enkuantu Vila-Vista tenta atu halo empata jogu maibé la konsege to’o minutu normál termina laiha golu ruma no vitoria prega metin ba Aimou, Vila-Vista fila ho laran triste hodi hein jogu seluk tuir mai.
Notisia relevante:Klube Zhavia FC empata ho Pilatus Buruma FC iha jogu kopa Xanana
Jornalista: Hortencio Sanchez
Editór: Florencio Miranda Ximenes
