DILI, 08 maiu 2024 (TATOLI) – Juiz Alvaro Maria, rezigna aan ona, maske, antes ne’e, kaer kazu ba matebian José Bernardo ne’ebé mate iha Sela Caicoli, Komandu Polísia Nasionál Timor-Leste (PNTL), Munisípiu Dili.
Rezignasaun hosi Juiz, Ministériu Públiku submete pedidu ba juiz koletivu ne’ebé kaer prosesu ne’e atu halo fali julgamentu foun ba arguidu sira ne’ebé suspeita envolve iha kazu José Bernardo nia mate.
“Juiz Alvaro Maria ne’ebé antes ne’e hanesan Juiz ne’ebé kaer prosesu kazu José Bernardo nian, agora daudaun husik ona funsaun hanesan Juiz tanba foin daudaun hato’o ona nia rezignasaun ba Konsellu Superiór Majistratura Judisiáriu no Konsellu ezonera ona, entaun tempu ne’ebé iha, nia labele halo ona desizaun, tanba ne’e hanesan Prokuradór hato’o pedidu ida ba Tribunál koletivu ida-ne’e atu haree hodi halo ré-julgalmentu ba kazu ida-ne’e’’, Prokuradór Aderito Tilman hateten iha sala julgamentu TJPID, kuarta ne’e.
Tuir ajenda ne’ebé iha, Tribunál koletivu atu rona sasin sira-nia depoimentu, maibé lakonsege tanba iha sala julgamentu liuhosi Ministériu Públiku Prokuradór Titulár ne’ebé kaer kazu, Prokuradór Aderito Tilman iha nia intervensaun, husu ba Tribunál koletivu atu halo ré-julgamentu ba kazu José Bernardo ne’ebé mate iha Sela Caicoli ho razaun Juiz koletivu ne’ebé prezide kazu ida-ne’e, ida rezigna aan ona hosi nia funsaun hanesan Juiz.
Prokuradór rekorda, Tribunál antes ne’e, halo ona inspesaun ba lokál krime iha 20 marsu, iha sala detensaun Komandu PNTL Dili, hafoin ida-ne’e Juiz ne’ebé kaer prosesu ne’e rezigna aan, entaun labele kontinua prosesu julgamentu ne’e ba oin.
“Tanba ne’e husu ba Tribunál koletivu atu halo re-julgamentu fali ba kazu ida-ne’e, tanba parte hotu koopera ba justisa maibé tanba Juiz prosesu ne’ebé kaer kazu mak hatama karta rezignasaun”, nia adianta.
Parte Defeza hosi arguidu sira, Estaqui Guteres aseita pedidu hosi Prokuradór Titulár ne’ebé kaer kazu José Bernardo ne’ebé husu Tribunál atu halo julgamentu foun.
“Ha’u aseita pedidu Ministériu Públiku nian ne’ebé husu Tribunál koletivu ida-ne’e atu halo julgamentu foun tanba Juiz koletivu ne’ebé prezide kazu ne’e ida agora rezigna aan hosi Juiz”, nia afirma.
Hodi hatan ba kestaun ne’e, Juiz koletivu Juiza Julmiatia Freitas, katak hanesan Juiz koletivu ne’ebé kaer kazu ne’e, konsidera pedidu Ministériu Públiku ne’ebé husu atu halo julgamentu foun.
“ Dr Alvaro antes ne’e nia mak hanesan Juiz Prezidente hodi prezide koletivu ida-ne’e, maibé tanba rezigna aan ona hosi kna’ar hanesan Juiz entaun Ministériu Públiku nia pedidu, ami sei tau hotu hamutuk ho faktu ba kazu ida hodi remete fila fali ba iha Tribunál Rekursu, nune’e Konsellu Superiór Majistratura Judisiáriu bele deside fila fali mai Tribunál Judisiál Primeiru Instánsia Dili atu halo fali julgamentu foun ba kazu ida-ne’e”, nia konklui.
Notísia relevante : KSMJ deside ezonera Juiz na’in-rua no suspende ida
Kazu José Bernardo mak Autoridade Judisiáriu inspesiona sela detensaun Komandu PNTL
Jornalista: Natalino Costa
Editór : Zezito Silva
