Instituto Camões mantein kooperasaun ho Ministériu Interiór iha prioritáriu tolu

DILI, 09 maiu 2024 (TATOLI) – Ministru Interiór (MI) Francisco da Costa Guterres, dehan Governu Portugal liuhosi Instituto Camões hakarak mantein kooperasaun ho Ministériu Interiór iha área seguransa, servisu migrasaun no bombeiru.
“Prezidente Instituto Camões de Portugal, ohin mai iha ne’e tanba ita bo’ot sira hatene Instituto Camões hanesan instituisaun ida ne’ebé mak Governu Portugés fó fiar ba sira atu jere kooperasaun entre Governu Portugés ho nasaun sira seluk. Entaun mai iha Interior ita hakarak mantein kooperasaun ho sira iha área seguransa, servisu migrasaun no bombeiru”, Francisco Guterres ba jornalista sira hafoin simu vizita Prezidente Instituto Camões Portugal iha Ministériu Interiór Vila-Verde, kinta ne’e.
Nia esplika, Instituto Camões hakarak fó formasaun ba Polísia Nasionál Timor-Leste, partikularmente rekrutamentu polisiál ne’ebé bolu siénsia polisiál, formasaun bázika ba akadémika polísia nian no jestaun no kontrolu iha área fronteira nian.
“Iha área migrasaun nian, sira uluk ajuda ita tanba apoia ita-nia Servisu Migrasaun, entaun agora ita husu sira atu apoia ita fila fali ita iha Servisu Migrasaun nian iha área jestaun kontrolu fronteira tanba sira iha sistema di’ak ba ida-ne’e tanba ne’e ita husu sira para apoia fali ita, tau sira-nia tékniku sira mai para sira apoia ita, ba futuru ita bele mellora di’ak liután ita-nia servisu kontrollu fronteira,”nia adianta.
Francisco hateten, Ministériu Interiór mós husu ba Instituto Camões para bele apoia iha área Protesaun Sivil hodi haree ba kestaun emerjénsia, kuandu iha inundasaun no mota tún mak estraga ema nia uma ne’e oinsá ita atu responde lalais ba situasaun sira ne’e.
“Entaun ita presiza sira no sira bele apoia ita tanba hakarak ka lakohi sira tenke apoia ita-nia bombeiru tanba uluk sira mak hahú treinu, forma ita-nia bombeiru to’o agora ita husu para sira mós kontinua apoiu ida-ne’e”, nia subliña.
Governante ne’e dehan Institutu Camões, prontu apoia Ministériu Interiór ba iha área tolu ne’e.
“Sira konkorda, sira sei tau hamutuk hanoin sira ne’e hodi hato’o fali ba Governu Portugal para ba implementa. Kooperasaun ne’e sei implementa iha tempu badak nia laran tanba agora iha Portugal sira mós Governu foun, espera katak sira ita bele koopera sira ne’e, ita bele implementa iha tempu badak”, nia dehan.
Iha fatin hanesan, Prezidente Instituto Camões Portugal, Ana Fernandes, hateten Instituto Camões, ohin mai vizita Ministériu Interiór hodi afirma pozisaun Portugal nia no mantein kooperasaun ne’ebé halo ona antes.
“Liuhosi vizita ne’e, ami ho Ministru Interiór Timor-Leste diskute área kooperasaun sira mak fó formasaun iha área administrasaun interna, siénsia polísia no ba área Protesaun Sivíl. Área kooperasaun sira ne’e ami sei informa ba ami-nia Governu atu iha implementasaun”, nia dehan.
Jornalista: Natalino Costa
Editór : Zezito Silva

