DILI, 09 maiu 2024 (TATOLI) – Ministru Interiór (MI), Francisco da Costa Guterres, hakarak halo restruturasaun ba kargu Prezidente Autoridade Protesaun Sivíl (APC, sigla portugés) no kargu xefia sira seluk tanba mandate konklui iha fulan ida-ne’e.
“Ita sei halo restruturasaun ba kargu xefia iha Autoridade Protesaun Sivíl iha fulan ida-ne’e nia laran, tanba agora ne’e kargu xefia sira ne’ebé mak agora iha protesaun sivíl ne’e mandatu hotu ona. Sira iha ne’ebá ne’e agora mantein hanesan halo de’it jestaun babain de’it ona, sira la’os ona foti desizaun hodi hein nomeasaun foun”, Francisco Guterres ba jornalista sira iha nia kna’ar fatin, Vila-Verde, kinta ne’e.
Governante ne’e hateten, ba kargu Prezidente Autoride Protesaun Sivíl sei okupa hosi ema sivíl inklui mós Komandu Operasaun Autoridade Protesaun Sivíl iha munisípiu 14 ne’ebé antes ne’e okupa hosi membru polísia ho deviza ofisiál sira sei troka fali ba ema sivíl atu okupa fatin ida-ne’e.
“Ba kargu Prezidente Autoridade Protesaun Sivíl, ita sei troka no sei okupa hosi ema sivíl ida, maibé agora daudaun ami buka hela ema sivíl ne’ebé mak atu ba tur iha ne’ebá. Ba Komandu Operasaun Autoridade Protesaun Sivíl ita sei troka hotu kedan”, nia adianta.
Francisco Guterres, subliña lei ba kriasaun Autoridade Protesaun Sivíl ne’ebé molok ne’e aprova iha 2022, iha artigu 13 fó biban ba Ofisiál Superiór hosi PNTL bele okupa kargu xefia iha Autoridade Protesaun Sivíl.
Nia esplika, lei kriasaun autoridade protesaun sivíl ne’e Ministériu Interiór lori ona ba Konsellu Ministru no halo ona revogasaun no Prezidente Repúblika José Ramos Horta promulga ona no lei ne’e entra ho vigór, no hosi lei foun ne’e fó dalan ba ema sivíl bele okupa kargu xefia iha Autoridade Protesaun Sivíl.
“Autoridade Protesaun Sivíl ba oin lae ona, sivíl mak sei lidera, agora ita buka hela tanba lei kriasaun autoridade protesaun sivíl foin lalais revoga tiha ona, no promulga ona entaun ita implementa lei foun, la presiza tenke polisia mak okupa kargu xefia iha autoridade protesaun sivíl maibé ema sivíl mós bele”, nia afirma.
Ministru Interiór sei halo restruturasaun ba kargu xefia iha Servisu Migrasaun no Komandu PNTL.
“Servisu Migasaun ne’e ita sei hadia hotu, maibé neneik ita labele muda derepente de’it. Ita mós sei halo restruturasaun ba Komandu Jerál PNTL maibé sei haree aprovasaun lei orgánika PNTL no estatutu pesoál profisionál PNTL foun iha Konsellu Ministru”, nia haktuir.
Nia dehan, presiza halo restruturasaun iha Komandu Jerál PNTL tanba presiza hadia buat balun iha instituisaun PNTL atu ema bele hadia di’ak servisu instituisaun PNTL nian.
Governante ne’e dehan, bainhira MI halo restruturasaun ba Komandu PNTL sei haree uluk aprovasaun lei orgánika PNTL no estatutu pesoál profisionál PNTL foun.
“Kuandu estatutu ho lei-orgánika kuandu aprova ona, imi mai husu ba ha’u, saida mak ita halo ba instituisaun PNTL”, nia konklui.
Jornalista: Natalino Costa
Editór : Zezito Silva
