Ministériu Agrikultura hasa’e produsaun ikan hodi aumenta nivel konsumu populasaun
DILI, 10 Maiu 2024 (TATOLI) – Ministériu Agrikultura, Pekuária, Peska no Floresta (MAPPF) foku ba hasa’e, entre 2024 no 2028, produsaun ikan iha rai-laran ba tonelada rihun 15, nune’e bele aumenta nivel konsume populasaun nian hodi hadi’ak saúde.
Diretór-Jerál Peska, Akikultura no Jestaun Rekursu Akuátiku, Celestino Barreto, adianta katak ministériu sei aumenta mós atividade haki’ak ikan sira atu hasa’e produsaun, tanba meta Governu nian mak ema ida tenke konsome ikan husi kilógrama 10 ba 15 kada tinan.
“Ita-nia programa ne’e la haree de’it ba atividade peska iha tasi laran, maibé kontinua tau atensaun ba atividade haki’ak ikan sira, nune’e produsaun ikan bele iha balansu”, diretór dehan iha Comoro, ohin.
Diresaun iha ona senáriu ida katak, kada tinan, atividade peska iha tasi laran tenke prodús ikan tonelada rihun sia no ba atividade akikultura nian tonelada rihun haat.
Tuir nia, atu halo balansu ba produsaun ikan iha tasi laran no ikan haki’ak ne’e, Ministériu Agrikultura liuhusi Diresaun Akikultura instala ona sentru viveiru iha Viqueque-Loihunu, Manufahi-Same Vila, Ermera-Gleno, Baucau-Vemasse no Bobonaro-Mugis. Iha tinan oin, sei instala tan sentru tolu iha Viquque, Ainaro no Covalima, nune’e bele aumenta sentru sira ne’ebé eziste hodi responde ba planu ne’ebé trasa ona.
Sentru tolu ne’ebé atu instala tan ne’e ninia kustu tama ona iha konsiderasaun no kada sentru prevee rihun $3-resin no sei kompleta ho ekipamentu hodi bele ajuda grupu haki’ak-na’in sira. Daudaun ne’e, iha ona grupu akikultór hamutuk 21 mak eziste iha territóriu. Númeru ne’e konsidera sei ki’ik, tanba ne’e iha ona proposta husi grupu lubun ida maka hatama ona no iha prosesu verifikasaun.
Ministru Agrikultura, Pekuária, Peska no Floresta, Marcos da Cruz, husu ba diresaun akikultura atu haree planu ba produsaun ikan ona ne’ebé agora grupu sira haki’ak ne’e bele buras liután no loke nafatin oportunidade ba grupu sira ne’ebé iha interese atu haki’ak ikan.
“Ha’u husu ba ita-boot sira atu tau atensaun ba atividade sira ne’ebé hala’o ona iha sentru viveiru ikan sira ne’ebé ita instala ona, nune’e bele hetan produsaun ikan ho di’ak hodi bele apoiu ba ita-nia populasaun sira iha territóriu”, dehan.
Notísia relevante: MAPPF nia planu no atividade iha 2025 kontinua foku ba hasa’e produsaun
Jornalista: Tomé Amado
Editora: Maria Auxiliadora
