Xefe Governu orienta MKI promove produtu lokál durante feira iha Dili
DILI, 14 maiu 2024 (TATOLI) – Primeiru-Ministru (PM), Kay Rala Xanana Gusmão, husu bá Ministériu Komérsiu no Indústria (MKI) ne’ebé sei organiza feira iha Díli, atu promove produtu lokál.
Primeiru-Ministru husu ne’e durante enkontru ho Vise-Ministru Komérsiu no Indústria, Augusto Juniór Trindade ne’ebé atualiza kona-bá preparasaun feira durante semana ida iha Dili atu komemora loron restaurasaun independénsia ba dala-22.
“Primeiru-Ministru mak sei halo abertura ba feira ne’e no sei hato’o mós mensajen. Xefe Governu husu atu produtu sira ne’ebé sei promove tenke produtu lokál duni no mai duni hosi munisípiu ka postu,” nia hateten hafoin hasoru PM Xanana iha palásiu Governu, tersa.
Kona-ba ne’e, Ministru informa bá Primeiru Ministru katak, produtu sira ne’ebé sei promove durante feira ne’e orgániku duni, kualidade no presiza mobiliza atu oinsá hasa’e nia kuantidade nune’e bele lori bá merkadu.
Feira ne’e realiza hosi Ministériu Komérsiu no Indústria (MKI) iha área Portu Dili, hahú hosi loron 15 to’o 20 maiu 2024, orsamentu bá feira iha territóriu nasionál hamutuk $600.000.
Notísia relevante: MKI organiza feira promove produtu lokál iha Covalima
Jornalista: Hortencio Sanchez
Editór: Florencio Miranda Ximenes
