DILI, 14 maiu 2024 (TATOLI)–Xefe suku Madohi, Bernardino de Cristo Ferreira, sujere ba Governu atu haree fatin foun ka muda suku Madohi ba fatin seluk, tanba politika halo konstrusaun haluan aeroportu Prezidente Nicolau Lobato Comoro ne’e afeta ba populasaun aldeia lima iha suku ne’e.
Notísia Relevante: Bernardino de Cristo Ferreira releitu sai xefe suku Madohi
Aldeia lima ne’ebé afetadu ba iha konstrusaun aeroportu Nikolau Lobato mak hanesan aldeia Beto Leste, Anin Fuik, Naroman, Beto Barat no Terra Santa.
Nia parte, hato’o ona hanoin ida-ne´e ba Governu sentrál atu halo planeamentu ida-ne’ebé bolu naran transmigrasaun lokal, no iha planu desentralizasaun suku ne’ebé afeta ba programa hodi halo realokasaun populasaun ba fatin ida ho muda suku.
“Ita husu Governu atu tau konsiderasaun ba ida-ne’e tanba ita hasai populasaun ida-idak ne’e lori suku ba ne’ebé. Se ita harii tiha suku, maibé lahanoin ita-nia komunidade ne’e ita labele harii suku,” xefe suku Bernardino de Cristo Ferreira hateten ba Agência Tatoli, iha sede suku Madohi, tersa ne’e.
Relasiona ho konstrusaun aeroportu ne’e, autoridade lokal no Governu hasai ona agregadu família hamutuk 170 ho dignu, tanba fó indemnizasaun.
“Agregada familia 100 sai ho dignu, hela 77 mak disputa rai ho ita-nia Governu ne’ebé ita entrega ba ba terra propriedade no konsege rezolve. Iha familia tolu mak labele hetan direitu ba rai, tanba espasu ne’ebé sira oukupa ne’e espasu públiku,” nia dehan.
Nia sujere ba Governu tenke buka fatin hodi bele hasai populasaun dala ida ho mudansa suku fatin ida.
“Ami-nia espetativa mak Governu buka uluk fatin atu hasai dala ida. Tuir loloos ita-nia Governu di’ak karik, buka uluk fatin hodi evakua populasaun ho nia suku. Ita halo konsulta populár ida, sé mak la’o nafatin ho suku, sé mak fila ba nia fatin uluk. Ne’e para ita bele solusiona programa tata kota,” nia hateten.
Líder komunitária ne´e hateten, sei apoiu tebe-tebes programa Governu nian maibé sira mós tenke kria planu ida adekuadu, sustentável atu bele koresponde ba povu nia dignidade.
Suku Madohi iha aldeia ualu mak hanesan Beto Leste, Beto Tasi, Anin Fuik, Naroman BT, Rosário, 7 Dezenbru no Terra Santa, Loro Matan BT, nia totál populasaun hamutuk ho nia totál populasaun 23 mil.
Jornalista : Jesuína Xavier
Editór : Cancio Ximenes
