iklan

ELEISAUN

Bernardino de Cristo Ferreira releitu sai xefe suku Madohi

Bernardino de Cristo Ferreira releitu sai xefe suku Madohi

Xefe Suku Madohi, Bernardino de Cristo Ferreira. Imajen Tatoli/Francisco Sony

DILI, 14 maiu 2024 (TATOLI)–Xefe suku atuál Bernardino de Cristo Ferreira releitu sai xefe suku Madohi iha eleisaun órgaun suku segunda ronda iha períodu 2024 to’o 2030, ho votu 2.551 husi totál eleitór hamutuk 4.478.

Notísia Relevante: Populasaun Madohi ezerse direitu votu iha eleisaun segunda ronda

Xefe suku eleitu ne´e hateten, iha nia mandatu iha tinan hitu oin mai sei kontribui ba iha planu Governu ba iha dezenvolvimentu nasionál.

“Ha’u kontinua iha responsabilidade atu apoiu planu Governu sentral atu liberta ita nia povu. Maske defísil, ita esforsu atu atinje objetivu,” xefe suku Madohi, Bernardino de Cristo Ferreira hateten ba jornalista sira iha sede suku Madohi, tersa ne´e.

Nia hateten, sei garante mós hodi konsolida unidade no estabilidade iha suku atu bele kontribui ba dezenvolvimentu nasionál, hodi hala’o servisu hamutuk ho Governu atu eduka sidadaun kona-ba meiu ambiente mós no saudável.

“Atu lori povu ba moris di’ak no livre,” nia hateten.

Entretantu, kandidatu Dedi da Costa hetan votu hosi eleitór hamutuk 1.927 hosi totál eleitór hamutuk 4.478 hosi aldeia ualu iha suku Madohi.

Iha eleisaun órgaun suku ba segunda ronda ne’e iha mos votu nulu hamutuk 26 no iha votu branku hamutuk lima (5).

Tuir dadus, suku Madohi iha total eleitór hamutuk 11.332, maibé taxa partisipasaun menus tanba eleitór ne’ebé partisipa iha eleisaun segunda ronda ronda ne’e menus tebes.

Notísia Relevante: Eleisaun iha Madohi, Kandidatu Xefe Suku Bernardino no Dedi avansa ba volta daruak

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!