DILI, 13 maiu 2024 (TATOLI)–Populasaun suku Madohi, postu administrativu Dom Aleixo, munisipiu Díli, segunda ne´e, ezerse sira-nia dirietu votu ba daruak, tanba iha eleisaun órgaun suku 10 ne´ebé realiza iha 27 abríl ne´e, suku Madohi mós tama iha lista suku lima (5) ne´ebé avansa ba eleisaun segunda ronda.
Notísia Relevante: Eleisaun iha Madohi, Kandidatu Xefe Suku Bernardino no Dedi avansa ba volta daruak
Eleisaun órgaun suku ne´e hala´o iha tuku 09h00 dadeersan ne´e, sei hili kandidatu xefe suku na in-rua (2) mak hanesan xefe suku atuál Bernardino de Cristo Ferreira no Dadi da Costa.
Xefe suku atuál, Bernardino de Cristo Ferreira, hateten se reeleitu sai xefe suku mak nia parte hakarak garante estabilidade iha suku Madohi nia laran.
“Ha’u mak reeleitu ba xefe suku mak konsolida ita nia komunidade ba unidade nasionál no asegura estabilidade nasionál atu asegura dignidade Estadu,” kandidadti xefe suku, Bernardino de Cristo Ferreira, ba jornalista sira.
Aleinde ne´e, nia dehan, asuntu sosiál sira seluk hanesan infraestrutura, edukasaun no saúde mós importante ba populasaun iha suku Madohi atu bele dezenvolve.
Kandidatu xefe suku ho númeru sorteiu daruak, Dadi da Costa, hateten se populasaun aldeia ualu fó konfiansa ba nia atu lidera suku Madohi mak niasei kria unidade iha suku atu kontribui ba dezenvolvimentu nasionál.
“Ha’u hakarak estabilidade no kria pás iha bairu no aldeia atu bele hatene dezenvolvimentu iha ita-nia suku hodi kontribui pás no estabilidade iha sosiedade. Tanba ne’e mak ha’u kandidata aan ba xefe suku,” Dadi da Costa ba jornalista sira iha sede suku Madohi.
Nia esplika, dalan atu kria pás no estabilidade ba jovens sira iha suku mak hanesan kria kondissun liuhosi diálogu no amizade liuhosi atividade desportiva no múzika.
Nia iha planu atu kria ambiente saudável ka moos iha suku no atendimentu administrativa di’ak ba populasaun iha suku.
Kandidatu ne’e fiar aan, bainhira nia eleitu sai xefe suku ne´e depende povu iha aldeia ualu (8) ezerse sira-nia direitu votu.
Suku Madohi, iha totál eleitór hamutuk 11.332 ne´ebé kompostu husi mane 5.991 no feto hamutuk 5.341.
Suku Madohi estabelese ho aldeia ualu (8) mak hanesan aldeia 7 Dezembro, Anin Fuik, Beto Leste, Beto-asi, Loro Matan BT, Naroman BT, Rosário no Terra Santa.
Notísia Relevante: Suku lima hakat ba eleisaun segunda volta iha loron 13 maiu
Jornalista : Jesuína Xavier
Editór : Cancio Ximenes
