Ministériu Justisa husu PCIC servisu ho profisionál

DILI, 14 maiu 2024 (TATOLI) – Ministru Justisa Sergio da Costa Hornai, husu ba Polísia Sientífika Investigasaun Kriminál (PCIC) hodi halo servisu ho profisionál no impasiál hodi manan konfiansa hosi sidadaun sira.
“Ohin ita mai selebra ezisténsia PCIC ba dala-10 ho ezisténsia ida-ne’e Polísia Sientífika Investigasaun Kriminál tenke sai hanesan laboratóriu ida eselente, sai hanesan orgaun polísia kriminál ida ne’ebé profisionál, kapas, atu bele hasoru ameasa no dezafiu sira ne’ebé mak mai. Hanesan Ministru Justisa ha’u hakarak apela ba Polísia Sientífika Investigasaun katak tenke hatudu ita bo’ot sira-nia paisaun, unisma, hatudu justisa ho integridade no onra, dignidade no imparsiál hodi manan konvivénsia sidadaun sira-nian”, Sergio Hornai hateten iha nia intervensaun bainhira partisipa serimónia aniversáriu Polísia Sientífika Investigasaun Kriminál (PCIC, sigla portugés) iha salaun Multiozu GMN Bebora, tersa ne’e.
Nia dehan, PCIC tenke prepara aan hodi hasoru ameasa sira agora no ba futuru tanba ne’e husu ba hothotu nia apoiu atu hamutuk hasoru dezafiu sira ne’ebé mak mai.
“Governu konstituisionál ne’ebé ha’u hola parte, iha rai ida-ne’e, ita hotu nian obrigasaun para kompromete reafirma ita-nian kompromisiu oinsá mak ita atu dezenvolve setór justisa ida para atu hatan ba iha dezafiu sira ne’ebé mak mosu iha ita-nian rai no rejoionál. Orgaun Polísia Sientífika Invetigasaun Kriminál, Komisaun Anti-Korupsaun, PNSIK no Sevisu Migrasaun no mós institusaun relevante sira presiza artikula hodi presta no konsolida Estadu ida-ne’e hodi hasoru amesa sira ne’ebé mak”, nia adianta.
Iha fatin hanesan, Diretór PCIC, Vicente Brito, rekoñese katak ezisténsia PCIC iha tinan 10 buat balun lao seidauk to’o nia meta no presiza reforma.
“Buat ne’ebé mak ita haree lao ladún, konserteza tenke halo reforma”, nia afirma.
Nia dehan, ho ezisténsia PCIC nian ba dala 10, PCIC mós atinje buat barak tanba hahú hosi 2015-2023 PCIC, liuliu fó formasaun espesiál ba investigadór PCIC sira iha rai laran no rai li’ur liuhosi kooperasaun ne’ebé PCIC ho polísia judisiária Portugal, investigadór PCIC barak mak tuir ona formasaun espesializada.
Vicente lembra, iha 2015-2017, PCIC iha laboratóriu lima no iha 2024, PCIC iha laboratóriu ualu, entaun atu operasionaliza laboratóriu sira ne’e presiza formasaun.
Jornalista :Natalino Costa
Editór : Zezito Silva

