DILI, 15 maiu 2024 (TATOLI) – Segundu Komandante Jerál Polísia Nasionál Timor-Leste (PNTL) Komisáriu Polísia Pedro Belo, dehan konfrontu tuda malu entre joven sira ne’ebé akontese iha área Aitarak-Laran, Suku Kampung Alor, Postu Administrativu Dom Aleixo, Munisìpiu Dili, Komandu PNTL Munisípiu Dili detein suspeitu hamutuk 14.
Konfrontu ne’e akontese iha tersa (14/5) tuku 21:00, iha akontesimentu ne’e joven sira Aitarak-Laran mak halo uluk provokasaun ba joven sira hosi Kampung Alor.
Motivu hosi konfrontu ne’e, katak bainhira komunidade hosi área Kampung Alor halo enkontru hodi koalia preparativu komunidade Suku Kampung Alor nian ba simu illas Santo António.
Iha ámbito enkontru ne’e, ema deskoñesidu ida hosi Aitarak-Laran tuda fatuk ba sira ne’ebé halo hela enkontru ne’e, entaun joven sira hosi Kampung Alor la satisfas ho aktu ne’e, nune’e joven sira hosi Kampung Alor tuda hasoru no rezulta konfrontu tuda entre joven sira.
Hosi konfrontu ne’e, rezulta uma rua hetan estragu no motór tolu mós hetan estragu. Hosi konfrontu ne’e PNTL asegura kedan ema 14 hodi submete ba prosesu ba identifikasaun.
Iha prosesu identifikasaun ne’ebé Komandu PNTL Dili halo mak suspeita ba ema 14. Na’in-tolu mak konsidera hanesan minoridade no oras ne’e detein ona iha sela Komandu PNTL Dili Caicoli hodi kumpre oras 72 molok aprezenta ba Tribunál.
“Kazu horikalan ne’ebé akontese iha Aitarak-Laran, ita kaer ema 14. Hosi númeru ne’ebé mak ita identifika iha ema na’in-tolu mak minoridade maibé Tribunál sei bolu nia inan ho aman atu husu esklaresimentu”, Pedro Belo hateten ba jornalista sira iha Komandu Jerál PNTL Caicoli, kuarta nee.
Belo sublina, PNTL kontinua intensifika seguransa iha tempu kalan, liuliu servisu pesoál sekretu PNTL, halo patrollu no kontinua observa no identika fatin risku ba konflitu atu kuandu problema mosu PNTL halo kedan atuasaun hodi garante seguransa ba povu iha tempu kalan.
Jornalista: Natalino Costa
Editór : Zezito Silva
