DILI, 15 maiu 2024 (TATOLI) – Segundu Komandante Jerál Polísia Nasionál Timor-Leste (PNTL) Komisáriu Polísia, Pedro Belo, dehan PNTL kontinua buka tuir hela autór ne’ebé deskonfia prodús osan falsu hodi sirkula ona iha Timor-Leste (TL).
“Kona-ba osan falsu ne’e ita kontrola nafatin desde uluk to’o iha munisípiu sira hodi halo investigasaun sira no parte Servisu Informasaun Polísia buka tuir no rekolla informasaun iha terenu”, Pedro Belo hateten ba jornalista sira iha Komandu Jerál PNTL Caicoli, kuarta nee.
Nia afirma, Komandu PNTL seidauk simu keixa ruma hosi komunidade sira liga ho osan falsu.
“Sirkulasaun osan falsu ne’e to’o agora polísia seidauk simu keixa ruma kona-ba ida-ne’e tanba ne’e ha’u husu komunidade sira agora importante mak oinsá ita hamutuk liuliu komunidade sira ne’ebé mak simu osan falsu ne’e tenke iha keixa hodi informa hela ba polisia sira para ita oinsá atu bele kontrola ida-ne’e. Kuandu laiha informasaun hosi komunidade sira no komunidade sira mós nonok de’it oinsá mak ita deskobre no ita atu deskobre lalais ida-ne’e, maibé ita hakas aan kontinua nafatin hodi prevene aktus ida-ne’e”, nia adianta.
Belo lembra katak problema sirkulasaun osan falsu iha Timor-Leste iha tinan hirak liu ba, liuhosi servisu sekretu PNTL nian kolabora hosi komunidade mak konsege identifika fatin no suspeitu ne’ebé halo osan falsu no lori nia ba prosesu no detein suspeitu balun ne’ebé mak prodús osan falsu iha munisípiu.
“Agora sirkulasaun osan falsu iha Timor-Leste, tuir informasaun ne’ebé iha katak osan falsu hahú sirkula fali ona, entaun polísia iha nian servisu sekretu ne’ebé hanaran Servisu Informasaun Polísia, ita bele tuir no ita sei halo ligasaun iha rai laran tantu iha rai li’ur, ita mós sei halo koordenasaun di’ak ho ita-nia maluk nasaun viziñu para oinsá atu bele kontrola kona-ba ida ne’e”, nia konklui.
Notísia relevante : Komisaun C husu autoridade kompetente buka tuir autór prodús osan falsu
Jornalista: Natalino Costa
Editór : Zezito Silva
