Prezidente Repúblika husu apoia Indonézia halo estudu barrajen iha Timor-Leste
BAUCAU, 14 maiu 2024 (TATOLI) – Prezidente Repúblika José Manuel Ramos Horta, husu apoia ba governu Indonézia atu halo estudu nune’e konstrui barrajen bee ba natar iha Timor-Leste.
Xefe Estadu ko’alia asuntu ne’e tanba antes ne’e hala’o sorumutu ho Prezidente Repúblika Indonézia, Joko Widodo, bainhira halo vizta estadu nune’e liuhusi diskusaun Horta husu Governu Indonézia atu ajuda halo estudu tékniku kona-ba konstrusaun barrajen nune’e bele halo kaptasaun udan-been iha Timor-Leste hanesan provínsia Nusa Tenggara Timur (NTT).
“Ha’u koalia ona ho Prezidente Widodo favór ajuda ami ho estudu tékniku kaptasaun udan-been nian, tanba sira halo iha NTT di’ak tebes,” Xefe Estadu ko’alia iha Vemasse Tasi, Baukau, tersa ne’e.
Horta konsidera liuhusi barrajen bele fó benefísiu ba natar sira-ne’ebé abandona tanba seidauk asesu bee liuhusi kanál irrigasaun ba natar.
Alende ne’e benefísiu husi barrajen kaptasaun udan-been bele ajuda hasa’e produtividade tanba bee garantia atu halo moris natar sira-ne’ebe abandona kleur.
“Iha futuru ita bele hetan apoiu ruma husi nasaun seluk oinsá ita iha barrajen kaptasaun bee durante tempu udan ne’ebé ita bele uza ba multifunsaun,” Horta akresenta.
Xefe estadu, husu Governu tenke aselera prosesu dezenvolvimentu, tanba investidór estranjeiru mak mai investe no timoroan bele sai traballadór iha rain-rasik.
Ministru Agrikultura, Pekuária, Peska no Floresta (MAPPF), Marcos da Cruz, rekoñese setór agrikultura atu avansa ba oin prezisa tulun husi Prezidente Repúblika Horta nia apoia liuhusi diplomasia ho nasaun seluk, atu investe iha hanesan konstrusaun barrajen kaptasaun udan-been nian iha Timor-Leste.
Governu liuhusi MAPPF halo ona kooperasaun ho Governu Xina kona-ba konstrusaun barrajen no tékniku sira halo ona estadu ba mota 15 iha Timor-Leste nune’e deside atu halo konstrusaun barrajen iha munsípiu tolu tanba viabilidade hanesan Ainaro, Manufahi no Aileu.
“Ida iha parte Ainaro, ida iha Same ida fatin iha area Remexio, tolu nee mak ami informa ona ba Embaixaidor Xina maibé seidauk iha informasaun klaru,” Marcos da Cruz hateten.
Notísia relevante: Prezidente Repúblika apresia métodu hasa’e produsaun hare iha Vemasse
Jornalista : Natalino Belo
Editór : Evaristo Soares Martins
