DILI, 16 maiu 2024 (TATOLI) – Xefe Departamentu hosi Dirasaun Tránzitu Seguransa Rodoviáriu Nasionál, Superintendente Asistente, Luis Costa, dehan Tránzitu Seguransa Rodaviáriu Nasionál, asegura motór ilegál ualu tanba laiha dokumentu komprovativu.
“Operasaun ne’ebé ita-nia Diresaun Tránzitu Seguransa Rodaviáriu Nasionál hamutuk ho Tránzitu Munisípiu Dili halo konsege asegura motór ilegál ualu. Ita konsidera motorizada sira ne’e ilegál tanba momentu ita-nia tránzitu sira halo check point nain ba motór sira ne’e la aprezenta dokumentu komprovativu”, Superintendente Asistente, Luis Costa, hateten ba jornalista sira iha Kuatel Jerál PNTL Caicoli, kinta ne’e.
Nia dehan, Polísia Tránzitu, iha semana rua liu ba, halo mós apreensaun ba motorizada ho sapa matríkula plástiku ka ida laos orijen ne’e iha 232.
“Ami komunika ona iha Dirasaun Nasionál Transporte Terestre atu haree asuntu ne’e tanba check point sira hanesan ne’e ami normalmente halo koordenasaun ho sira parte DNTT, atu bele identifika xapa matríkula hirak ne’ebé prodús ona, tanba na’in ba motor no karreta maioria maka to’o ohin loron sira seidauk ba foti xapa matríkula”, nia salienta.
Nia dehan, atividade pasa revista ne’ebé PNTL halo iha semana rua kotuk liu ba, apreende mós ba karreta privadu hamutuk 26 ne’ebé mak laiha xapa matríkula orijinál.
“Motór hotu ninia xapa matríkula hosi letra A to’o Y, sira-nia xapa matríkula orijinál iha hotu ona, inklui mós karreta sira ho xapa prodús letra B-15-500 agora xapa matríkula iha ona, tanba laiha razaun atu argumenta xapa matríkula seidauk prodús”, nia informa.
Luis hateten, normalmente kuandu tránzitu halo pasa revista maka hetan kestaun sira ne’e, PNTL automatikamente aplika koima transporte hirak ne’e.
“Tanba ne’e husu motorista atu hakbesik aan ba DNNT atu haree ita bo’ot sira-nia xapa matríkula orijinal ne’ebé prodús ona iha DNTT, depois sira lori mai monta ba idaidak ninia transporte”, nia konklui.
Jornalista: Natalino Costa
Editór : Zezito Silva
