EKONOMIA, HEADLINE

Mudansa iha kontratu, membru 400 hapara negósiu ho Loja Agrikultura

Mudansa iha kontratu, membru 400 hapara negósiu ho Loja Agrikultura

Loja Hakbiit Agrikultura iha Meimart Fatuhada. Imajen/Facebook

DILI, 17 Maiu 2024 (TATOLI) – Membru na’in-400 la ativu ona hodi lori sira-nia produtu lokál bá hatama iha Loja Hakbiit Agrikultura, tanba iha mudansa ba presu kontratu, informa responsavel Loja Agrikultura, Teovaldo Saores.

Dirijente ne’e adianta katak daudaun ne’e iha membru 200, inklui grupu foun rua ho ninia membru na’in-hitu maka kontinua hatama sira-nia produtu iha loja tanba konsidera presu kontratu ne’ebé loja na’in halo ho sira ne’e la fó impaktu.

“Ita iha problema uitoan ho presu kontratu ne’ebé ita halo ho membru sira. Tanba ne’e, iha membru 400 mak agora la ativu ona hatama produtu. Durante ne’e sira tau fiar ba ema seluk maka lori sira-nia produtu mai hatama, entaun mudansa presu ne’e ladún fó benefísiu ba ema terseiru ne’e”, Teovaldo Soares dehan ba Tatoli iha Fatuhada, ohin.

Nia esplika katak mudansa presu kontratu ne’ebé parte loja halo ho membru sira ne’e, kada produtu sei kona 25% bainhira ema sosa ona. “Purezemplu, batar plástiku ida $1, bainhira loja fa’an ona sei ko’a sentavu 0,25. Presu ida kuaze implementa ba produtu hotu, maibé parte seluk ladún konkorda tanba presu 25% ne’e boot liu”.

“Antes ne’e, ita ko’a sentavu 0,15 bainhira Loja Agrikultura ne’e sei hamutuk ho Ministériu Agrikultura, maibé agora ministériu entrega ona ba ita mak jere fali loja ne’e, ita tenke halo ninia sistema foun tanba fasilidade ne’ebé ita uza hodi loke loja ne’e mós ita aluga kada fulan $1.000”, nia afirma.

Nia salienta katak presu sentavu 0,25 ne’ebé loja halo ona kontratu ho membru ativu sira ne’e atu uza hodi apoia mós ba nesesidade sira seluk ne’ebé loza ne’e presiza. Ba membru 400 ne’ebé konsidera la ativu hahú iha Abríl mai tanba durante ne’e sira tau fiar ba ema seluk maka lori sira-nia sasán bá hatama iha loja ne’e.

“Ha’u husu ba to’os-na’in sira atu di’ak liu sira maka lori rasik produtu ne’ebé produs mai hatama iha Loja Hakbiit Agrikultura ne’e, atu labele hamate no impede fali negósiu ne’ebé imi halo ona ho loja”, nia sujere.

Maria Anabela dos Santos, membru ativu husi na’in-200 ne’e hateten katak sira kontinua kumpre kontratu ne’ebé halo ho loja, tanba produtu ne’ebé prodús iha to’os laran sira na’in rasik maka lori direta bá hatama, tanba ne’e la prejudika buat ida hodi hamata fali sira-nia negósiu.

“Ami iha munisípiu Aileu-Seloi, durante ne’e, kuda modo oioin. Fulan ida ami lori dala rua mai hatama iha loja. Ami na’in rasik maka lori mai ne’ebé laiha problema ida ho kontratu ne’ebé halo ho loja ne’e rasik”, nia salienta.

Nia husu ba maluk negosiante sira seluk ne’ebé serbisu iha to’os katak bainhira hakarak hetan lukru ida di’ak tenke envolve direita hodi labele impede fali negósiu ne’ebé halo ona.

Notísia relevante: Ministru Marcos klarifika razaun la selu produtu loja Hakbi’it Agrikultura

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!