HEADLINE, SEGURANSA

PNTL detein joven na’in-lima sona kanek vítima João Ximenes

PNTL detein joven na’in-lima sona kanek vítima João Ximenes

Komandante Sup Xefe Munisípiu Dili, Orlando Gomes. Imajen Tatoli/Francisco Sony

DILI, 17 maiu 2024 (TATOLI) – Komandante Polísia Nasionál Timor-Leste (PNTL) Munisípiu Dili Superintendente Xefe Polísia, Orlando Gomes, hateten PNTL detein ona suspeitu na’in-lima ne’ebé mak envolve iha krime tentativa omisídiu hodi lori safenda sona vítima João Ximenes ninian kotuk laran to’o sofre kanek bo’ot iha área Manleuna, Suku Manleuna, Postu Administrativu Dom Aleixo, Munisípiu Dili iha kinta (16/05).

Kazu ne’e akontese iha kinta (16/05) horikan iha tuku 80:15 kalan. Motivu hosi kazu ne’e mak bainhira vítima João Ximenes fila hosi Delta no to’o iha área Maneluna nian, nia haree iha joven sira hemu tuur iha estrada ninin sira hodi hemu tua iha estrada ninin no halo provokasaun ba vítima, entaun vítima ne’e mós la satisfas no vítima ne’e ba uma no fila fali mai, sira konsege baku malu, iha baku malu ne’e na’in-ida foti sefenda sona iha vítima nia kabas no rezulta kanek bo’ot.

“Ho akontesimentu, komunidade informa kedan ba Delta Base no PNTL Eskudra Dom Aleixo no patrollamentu inklui SNI hodi asegura kedan suspeitu na’in-lima iha fatin akontesimentu depois lori mai eskuadra Dom Aleixo hodi halo prosesu investigasaun. Hafoin halo tiha prosesu identifikasaun ba suspeitu sira ne’e PNTL detein kedan suspeitu na’in-lima ne’e”, nia konta.

Suspeitu na’in-lima ne’ebé mak PNTL detein iha sela Komandu PNTL Dili mak hanesan JX, JB, JS, JM no CN.

“Sira ne’e agora daudaun ita detein ona iha sela detensaun Komandu PNTL Dili hodi kumpre oras 72 molok ita submete ba Ministériu Públiku hodi lori ba interogatóriu dahuluk iha Tribunál Judisiál Primeiru Instánsia Dili”, nia mensiona.

Komandante Gomes hateten, vítima João Ximenes agora daudaun família sira lori ona ba Hospitál Guido Valadares hodi halo tratamentu.

Jornalista: Natalino Costa

Editór : Zezito Silva

 

 

 

iklan
iklan

Leave a Reply

iklan
error: Content is protected !!