KKSJ deside, tinan ne’e, halo rekrutamentu ba Defensór Públiku
DILI, 20 maiu 2024 (TATOLI) – Defensoria Públika Jerál, Cancio Xavier, hateten Konsellu Konsultivu Setór Justisa (KKSJ) deside, tinan ne’e, halo rekrutamentu ba Defensória Públika hodi bele haforsa servisu Defensoria Públika iha futuru.
Tuir Cancio Xavier katak totál rekursu ba Defesoria Públika iha ema 34 no rekursu ida-ne’e labele kobre servisu Defensoria Públika Jerál hodi fó asisténsia legál ba to’o munisípiu sira.
“Entaun ho kondisaun ida-ne’e mak liuhosi reuniaun Konsellu Konsultivu Setór Justisa konsidera no tinan ida-ne’e presiza halo rekrutametu ba Defensoria Públika no tinan oin mós Konsellu deside katak tinan oin loke formasaun ba Defensór sira”, Cancio Xavier dehan ba jornalista sira bainhira partipasa serimónia loron restaurasaun independénsia Timor-Leste ba dala -22 ne’ebé halao iha Palásiu Prezidensiál, segunda, ohin.
Nia esplika, rekrutamentu ne’e nu’udar ejizénsia povu nian atu hatan ba públiku liuliu atendimentu ba área justisa nian iha área notariadu inklui Defensoria Públika oinsá atu fó asisténsia ba povu.
Cancio Xavier rekoñese katak Defensoria Públika ladún hatudu servisu ne’ebé di’ak tanba limitasaun ba rekursu umanu.
“Tanba ne’e, tinan ne’e, sé bele ita halo rekrutamentu ba Defensór Públika, presiza ema 45 para nune’e aban bainrua bele mellora di’ak liután servisu Defensoria Públika”, nia adianta.
Nia haktuir Defensoria Públika sei iha indifisiénsia liuliu iha parte rekursu umanu, maibé hanesan instituisaun Estadu ne’ebé mak fó asisténsia legál ba sidadaun Defensór Públika sira nafatin fó asisténsia legál ba sidadaun sira to’o iha área remota.
“Agora daudaun, ami-nia kobertura kontinua mós fó asisténsia legál ita-nia maun alin sira iha munisípiu, tantu sira ne’ebé dook hosi munisípiu liuliu ba sira ne’ebé iha área remota no ha’u bele dehan pursentu 75, Defensoria Públika halo kobertura ho fó asisténsia legál ba ita-nian povu sira iha munisípiu hotu. Maske ho esforsu sira ne’e ita sei dezafia mai ita koko atu rezolve liuhosi rekrutamentu ne’ebé ita sei halo tanba dezafiu ba Defensoria Públika mak rekursu umanu”, nia hakotu.
Jornalista: Natalino Costa
Editór : Zezito Silva
