HEADLINE, SEGURANSA

PNTL identifika ‘Susar’

PNTL identifika ‘Susar’

Logotipu PNTL

DILI, 23 maiu 2024 (TATOLI) – Polísia Nasionál Timor-Leste liuhosi (PNTL), liuhosi Departamentu Investigasaun Kiminál (DIK), bolu Amaro da Costa ‘Susar’ hodi halo prosesu identifikasaun, tanba halo suspeita ameasa ba entidade balun ne’ebé espalla iha rede sosiál foin lalais ne’e.

Iha audiu ne’e Susar hato’o espresaun krítika ba  Primeiru-Ministru Xanana Gusmão no Ministru Obras Públika (MOP), Samuel Marcal, tanba deskontente ho prosesu konkursu ne’ebé lao iha Ministériu Obras Públika tanba fó liu oportunidade ba Empreza Xina duké empreza lokál atu  halo reabilitasaun ba estrada iha Same.

Iha audiu ne’e Susar esplika katak prosesu ne’ebé mak MOP halo ne’e la justu tanba empreza hosi Manufahi inklui Susar nia empreza rasik ho Hoven II, tuir lolos sai manán nain ba konkursu reabilitasaun estrada iha Same maibé Governu la fó fi’ar ba empreza lokál atu ka’er projetu  reabilitasaun estrada iha Same maibé, Ministru Obras Públika halo konkursu ba reabilitasaun estrada iha área Same ne’ebé manán hosi empreza Xineza ida.

Tanba ne’e, mosu lamentasaun hosi Susar no hato’o protestu ba Xefe Governu no Ministru Obras Públika.

Hafoin prosesu identifikasaun, Susar hateten tanba PNTL mak bolu hodi halo identifikasaun kona-ba video ne’ebé virál iha rede sosiál katak nia lansa ameasa hasoru Primeiru-Ministru no Obras Públika.

“Ha’u mai tanba ema posting ha’u nia video ne’ebé koalia ba ha’u-nia projetu ne’ebé ami halao. Projetu ne’e ami hala’o iha 2017, to’o agora Governu pending hela tanba polítik ita lahatene. Maibé Ministru Obras Públika Samuel Marcal loke tán konkursu konsidera liu ema Xina hosi estranjeiru no la konsidera empreza lokál”, Amaro da Costa hateten ba jornalista sira iha Komandu Jerál PNTL Caicoli, kinta ne’e.

Nia dehan, empreza lokál sira lakon ona buat barak maibé ikus fali ministru asina kontratu ba Xina no lakonsidera empreza timor.

“Ha’u husu ba maun boot Xanana nudar Primeiru-Ministru, nia tau nia ema iha ne’ebá tenke haree didiak, tau ema ne’ebé atu servi ba povu no rai ida-ne’e, labele tau ema ne’ebé arbiru tau iha ne’ebá, ohin loron problema hela de’it tanba lakosidera nia ema iha nia rai rasik”, nia adianta.

Susar hateten, voice ne’ebé nia halo ne’e laiha motivu ameasa no voice atu fó hanoin de’it ba Governu.

“Voice ne’e mós ha’u nunka atu fó sai iha mídia maibé derepente sai fali no ema posting dehan ha’u sadik Xanana. Ha’u atu hateten Xanana, ha’u nia aman ba nasaun, veteranu ba nasaun, ha’u lakontra, ha’u kontra ida ne’ebé iha kraik ne’ebá, ministru sira, tanba sira mak halo hodi hafo’er Xanana nia naran, ohin loron tolok veteranus, tanba sira mak ha’u dehan ba maun bo’ot Xanana ha’u respeitu”, nia afirma.

Nia lamenta ho prosesu sira ne’ebé maka iha Ministériu Obras Públika tanba iha ministériu ne’e iha broker barak, sé mak fó osan entaun fó ona projetu ba, enkuantu empreza lokál dehan hein lai

“Ha’u krítika Samuel Marcal, nia tenke hadia nia lisan aat ida-ne’e, nia tenke hadia, nia laos servi ba povu, nia sai bo’ot laos atu servi ba Xina, ha’u nudar timoroan ha’u defende timoroan, laos dehan ha’u sadik Xanana maibé sadik Governu, para atu hadia, hau kritika para hadia”, nia dehan.

Susar mós promete sei hamutuk ho parte autoridade seguransa atu buka tuir ema ne’ebé espalla nia video iha mídia sosiál atu PNTL bele ka’er ema nune’e bele responsabliza ba nia aktus sira.

“Ha’u ho polísia sei buka tuir ema ne’ebé posting video ne’e”, nia koklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!